జిల్లావ్యాప్తంగా కూలిన 74 చెట్లు.. 42 విద్యుత్ స్తంభాలు ధ్వంసం

అనకాపల్లి (ప్రజాముద్ర ప్రతినిధి):
అర్నబ్ తుఫాను ప్రభావంతో అనకాపల్లి జిల్లావ్యాప్తంగా ఈదురుగాలులతో కూడిన భారీ వర్షం కురిసింది. తుఫాను తీవ్రతకు పలు మండలాల్లో భారీ వృక్షాలు, విద్యుత్ స్తంభాలు నేలకొరిగాయి. అధికార యంత్రాంగం బుధవారం ఉదయం 5 గంటల వరకు విడుదల చేసిన నష్టాల నివేదిక ప్రకారం, జిల్లాలో భారీ వర్షపాతం నమోదైనప్పటికీ ప్రాణ, పశు నష్టం తప్పడంతో ప్రజలు, అధికారులు ఊపిరి పీల్చుకున్నారు.
​74 భారీ వృక్షాలు నేలమట్టం
తుఫాను ధాటికి జిల్లాలోని పలు ప్రధాన రహదారులు, గ్రామీణ మార్గాల్లో మొత్తం 74 చెట్లు కూలి రాకపోకలకు అంతరాయం కలిగింది. సమాచారం అందుకున్న వెంటనే రెవెన్యూ, ఆర్ అండ్ బి, పంచాయతీ, అగ్నిమాపక శాఖల సిబ్బంది రంగంలోకి దిగారు. ఇప్పటివరకు 67 చెట్లను తొలగించి రాకపోకలను పునరుద్ధరించగా, మిగిలిన 7 చెట్లను తొలగించే పనులు వేగంగా సాగుతున్నాయి. అత్యధికంగా మునగపాక మండలంలో 16, ఎలమంచిలిలో 14, అచ్యుతాపురంలో 9, సబ్బవరంలో 7, కోటవురట్లలో 6 చెట్లు కూలిపోయాయి.
​దెబ్బతిన్న 42 విద్యుత్ స్తంభాలు.. 3 ఇళ్లకు పాక్షిక నష్టం
తుఫాను ఈదురుగాలుల ధాటికి జిల్లావ్యాప్తంగా మొత్తం 42 విద్యుత్ స్తంభాలు విరిగిపడ్డాయి. వీటిలో ఏపీఈపీడీసీఎల్ సిబ్బంది యుద్ధప్రాతిపదికన స్పందించి 20 స్తంభాలను పునరుద్ధరించారు. మిగిలిన 22 స్తంభాలను సరిచేసి విద్యుత్ సరఫరాను పునరుద్ధరించేందుకు ప్రయత్నాలు ముమ్మరం చేశారు. బుచ్చయ్యపేటలో 10, పరవాడలో 9, కశింకోటలో 4, ఎలమంచిలిలో 4 స్తంభాలు దెబ్బతిన్నాయి. కాగా, మునగపాకలో రెండు, రాంబిల్లిలో ఒక ఇల్లు దెబ్బతిన్నట్లు అధికారికంగా నమోదైంది.
​కశింకోటలో అత్యధిక వర్షపాతం.. 85 పునరావాస కేంద్రాల పరిశీలన
జిల్లావ్యాప్తంగా మొత్తం 4,593.2 మిల్లీమీటర్ల వర్షపాతం నమోదైంది. అత్యధికంగా కశింకోట మండలంలో 266.8 మి.మీ, మునగపాకలో 256.2 మి.మీ, పరవాడలో 244.2 మి.మీ, ఎలమంచిలిలో 235.8 మి.మీ వర్షపాతం రికార్డయింది. ముందస్తు జాగ్రత్త చర్యగా అధికారులు జిల్లాలోని 85 తుఫాను సహాయక, పునరావాస కేంద్రాలను నిరంతరం సందర్శిస్తూ సహాయక చర్యలను పర్యవేక్షిస్తున్నారు. ప్రజలు అప్రమత్తంగా ఉండాలని, అత్యవసరమైతే తప్ప బయటకు రావద్దని అధికారులు విజ్ఞప్తి చేశారు.