అనకాపల్లి, నవంబర్ 3 (ప్రజాముద్ర): నర్సీపట్నం మున్సిపల్ చైర్‌పర్సన్ ఎన్నికల్లో తెలుగుదేశం పార్టీ అభ్యర్థి చింతకాయల పద్మావతి విజయం సాధించారు. మొత్తం 35,765 ఓట్లు పోలవగా, పద్మావతికి 23,028 ఓట్లు లభించాయి. వైఎస్సార్ కాంగ్రెస్ పార్టీ అభ్యర్థి చింతకాయల అనితకు 11,573 ఓట్లు వచ్చాయి. స్వతంత్ర అభ్యర్థి బైపురెడ్డి చిట్టి శివ సంధ్యారాణికి 191 ఓట్లు పోలయ్యాయి. వీటితో పాటు 573 ఓట్లు చెల్లనివిగా నమోదవగా, 400 ఓట్లు నోటాకు పడ్డాయి. దీంతో చింతకాయల పద్మావతి 11,519 ఓట్ల మెజారిటీతో విజయం సాధించారు. అనంతరం నర్సీపట్నం రెవెన్యూ డివిజనల్ అధికారి వి.వి.రమణ ఆమెకు ఎన్నికల ధ్రువీకరణ పత్రాన్ని అందజేశారు.

అమరావతి: బంగాళాఖాతంలో ఏర్పడిన తీవ్ర తుపాను ‘మురసు’ మంగళవారం తెల్లవారుజామున ఆంధ్రప్రదేశ్ తీరాన్ని దాటింది. నెల్లూరు–నరసాపురం మధ్య ప్రకాశం జిల్లా ఒంగోలు సమీపంలో తెల్లవారుజామున 3.30 గంటల నుంచి 5.30 గంటల మధ్య తుపాను తీరం దాటినట్లు ఆంధ్రప్రదేశ్ రాష్ట్ర విపత్తుల నిర్వహణ సంస్థ (APSDMA), రియల్ టైమ్ గవర్నెన్స్ సొసైటీ (RTGS) సంయుక్తంగా వెల్లడించాయి. తుపాను ప్రభావంతో రాష్ట్రంలోని పలు జిల్లాల్లో భారీ వర్షాలు కొనసాగుతున్నాయి. తీరప్రాంతాల్లో బలమైన ఈదురుగాలులు వీచే అవకాశం ఉండటంతో అధికారులు అప్రమత్తంగా ఉన్నారు.

బెంగళూరు: అనంతపురం జిల్లా రాప్తాడు నియోజకవర్గంలోని జడ్పీ ఉన్నత పాఠశాలలో దాడికి గురై బెంగళూరులో చికిత్స పొందుతున్న పదో తరగతి విద్యార్థిని గోపికను వైఎస్సార్‌సీపీ అధినేత, మాజీ ముఖ్యమంత్రి వైఎస్ జగన్‌మోహన్ రెడ్డి పరామర్శించారు. ఆసుపత్రిలో వైద్యులను కలిసి ఆమె ఆరోగ్య పరిస్థితిని అడిగి తెలుసుకున్నారు. బాధిత కుటుంబ సభ్యులకు ధైర్యం చెప్పారు. ఈ సందర్భంగా జగన్ మాట్లాడుతూ.. పాఠశాలలోకి ఎలక్ట్రికల్ రంపంతో ఓ వ్యక్తి ప్రవేశించి విద్యార్థినులపై దాడికి పాల్పడటం తీవ్ర ఆందోళన కలిగించే విషయమన్నారు. విద్యార్థులకు పాఠశాలల్లోనే భద్రత లేకపోతే వారి భవిష్యత్తుకు ఎవరు భరోసా ఇస్తారని ప్రభుత్వాన్ని ప్రశ్నించారు. ప్రభుత్వ పాఠశాలల్లో భద్రతా చర్యలను పటిష్టం చేయాలని డిమాండ్ చేశారు. రాష్ట్రంలో గంజాయి, మద్యం, బెల్ట్ షాపుల నియంత్రణలో ప్రభుత్వం విఫలమైందని జగన్ ఆరోపించారు. మత్తు పదార్థాల ప్రభావం యువతపై పడుతోందని, శాంతిభద్రతల పరిరక్షణలో ప్రభుత్వం మరింత బాధ్యతగా వ్యవహరించాలని సూచించారు. రూ.50 లక్షల పరిహారం డిమాండ్ గోపిక కుటుంబానికి ప్రభుత్వం తక్షణమే రూ.50 లక్షల ఆర్థిక పరిహారం అందించాలని జగన్ డిమాండ్ చేశారు. బాధితురాలికి అత్యుత్తమ వైద్యం అందించే బాధ్యతను ప్రభుత్వమే తీసుకోవాలని కోరారు. ప్రభుత్వం పరిహారం అందించకపోతే వైఎస్సార్‌సీపీ తరఫున వైద్య ఖర్చులను భరిస్తామని, తమ పార్టీ అధికారంలోకి వచ్చిన నెల రోజుల్లో బాధిత కుటుంబానికి రూ.50 లక్షల ఆర్థిక సాయం అందిస్తామని హామీ ఇచ్చారు. రాప్తాడులో శాంతిభద్రతలపై విమర్శలు రాప్తాడు నియోజకవర్గంలో గత 15–16 నెలల కాలంలో మహిళలపై దాడులు, హత్యలు సహా తొమ్మిది తీవ్రమైన ఘటనలు చోటుచేసుకున్నాయని జగన్ పేర్కొన్నారు. రాష్ట్రంలో శాంతిభద్రతల పరిస్థితి క్షీణించిందని విమర్శించారు. పోలీసు యంత్రాంగం రాజకీయ ఒత్తిళ్లకు అతీతంగా పనిచేస్తూ ప్రజల భద్రతకు ప్రాధాన్యత ఇవ్వాలని అన్నారు. గోపిక ఆరోగ్య పరిస్థితిపై ఆరా దాడిలో తీవ్రంగా గాయపడిన గోపికకు బెంగళూరులోని ఆసుపత్రిలో సుమారు 11 గంటల పాటు శస్త్రచికిత్స నిర్వహించినట్లు జగన్ తెలిపారు. ఆపరేషన్‌ను బాలిక తట్టుకుందని, ప్రస్తుతం ఆరోగ్య పరిస్థితి మెరుగుపడుతోందని వైద్యులు వెల్లడించినట్లు చెప్పారు. మరో 48 గంటలు కీలకమని వైద్యులు తెలిపినట్లు వివరించారు. గోపిక త్వరగా కోలుకోవాలని ఆకాంక్షించిన జగన్, బాధిత కుటుంబానికి వైఎస్సార్‌సీపీ అండగా ఉంటుందని భరోసా ఇచ్చారు.

రాప్తాడులో పదో తరగతి విద్యార్థినిపై జరిగిన అమానవీయ దాడి వంటి ఘటనలు సమాజాన్ని ఆలోచింపజేస్తున్నాయి. ఇలాంటి సంఘటనలకు వ్యక్తిగత బాధ్యతతో పాటు సమాజంలో తగ్గిపోతున్న మానవతా విలువలు కూడా ఒక కారణమని భావించాల్సి ఉంది. పిల్లల్లో మంచి విలువలు, క్రమశిక్షణ, ఇతరుల పట్ల గౌరవం పెంపొందించడంలో తల్లిదండ్రుల పాత్ర ఎంతో కీలకం. పిల్లలపై ప్రేమ చూపించడం ఎంత ముఖ్యమో, అతిగా గారాబం చేయకుండా తప్పొప్పులను వివరించడం కూడా అంతే ముఖ్యం. పిల్లల్లో వస్తున్న శారీరక, మానసిక మార్పులను తల్లిదండ్రులు గమనించాలి. వారి భావాలను అర్థం చేసుకుని, అవసరమైనప్పుడు సరైన మార్గదర్శకత్వం అందించాలి. గెలుపుతో పాటు ఓటమిని స్వీకరించే మనస్తత్వాన్ని నేర్పాలి. ఇతర పిల్లలతో పోల్చకుండా ప్రతి ఒక్కరిలోని ప్రత్యేక ప్రతిభను గుర్తించి ప్రోత్సహించాలి. అలాగే పిల్లల స్నేహాలు, అలవాట్లు, ప్రవర్తనను గమనిస్తూ మంచి స్నేహాలు, పుస్తక పఠనం, క్రీడలు, నీతి కథల పట్ల ఆసక్తి పెంచాలి. పిల్లలు చెప్పే విషయాలను శ్రద్ధగా వింటూ, వారి సమస్యలకు ఓపికగా పరిష్కారాలు చూపాలి. నేటి చిన్న కుటుంబ వ్యవస్థలో పెద్దల పాత్ర తగ్గుతున్న నేపథ్యంలో తల్లిదండ్రులే పిల్లలకు మార్గదర్శకులుగా నిలవాలి. తాము ఆచరించే విలువలనే పిల్లలకు నేర్పాలి. ప్రకృతి, పశుపక్షాదులు, తోటి మనుషుల పట్ల ప్రేమ, దయ, కరుణ, విచక్షణ కలిగేలా పెంచాలి. పిల్లలకు ఆస్తిపాస్తులు ఇవ్వడం కంటే మంచి వ్యక్తిత్వాన్ని అందించడం గొప్ప బహుమతి. చదువులోనే కాకుండా మానవత్వంలోనూ పిల్లలు ఎదిగినప్పుడే ఆరోగ్యకరమైన సమాజం నిర్మాణమవుతుంది. భావితరాలకు మంచి సమాజాన్ని అందించాలంటే ప్రతి తల్లిదండ్రులిద్దరూ తమ బాధ్యతను గుర్తించాలి — శేషెట్టి గిరీష్ కుమార్ ( M.B.A, M.Sc Psy., M.A Pub.Admn. ) కరస్పాండెంట్, హ్యాపీ కిడ్స్ ప్లే స్కూల్ , వుడ్ పేట, అనకాపల్లి., 9032493934, 7799773763

అనకాపల్లి జిల్లాలో ప్రశాంతంగా ముగిసిన మున్సిపల్ పోలింగ్ ​ఎక్కడా అవాంఛనీయ ఘటనలు లేవు.. రీపోలింగ్ అవసరం లేదు: కలెక్టర్ విజయ కృష్ణన్ ​అనకాపల్లి, నవంబర్ 1: అనకాపల్లి జిల్లా పరిధిలోని నర్సీపట్నం, ఎలమంచిలి మున్సిపాలిటీలతో పాటు జీవీఎంసీ వార్డుల ఎన్నికల పోలింగ్ ఆదివారం అత్యంత ప్రశాంత వాతావరణంలో ముగిసిందని జిల్లా కలెక్టర్ మరియు జిల్లా ఎన్నికల అధికారి విజయ కృష్ణన్ తెలిపారు. ఎన్నికల ప్రక్రియలో ఎక్కడా ఎటువంటి అవాంఛనీయ సంఘటనలు చోటుచేసుకోలేదని, జిల్లాలో రీపోలింగ్ నిర్వహించాల్సిన అవసరం లేదని ఆమె స్పష్టం చేశారు. ​రాష్ట్ర ఎన్నికల సంఘం ఆదేశాల మేరకు ఉదయం 7:00 గంటలకు ప్రారంభమైన పోలింగ్ సాయంత్రం 5:00 గంటల వరకు నిరంతరాయంగా సాగింది. సాయంత్రం 5:00 గంటల సమయానికి పోలింగ్ కేంద్రాల వద్ద క్యూలైన్లలో వేచి ఉన్న ప్రతి ఒక్కరికీ ఓటు హక్కు వినియోగించుకునే అవకాశం కల్పించినట్లు కలెక్టర్ పేర్కొన్నారు. ​ప్రాంతాల వారీగా పోలింగ్ సరళి: ​ఎలమంచిలి మున్సిపాలిటీ (76.61%): ఎలమంచిలి పరిధిలోని 63 పోలింగ్ కేంద్రాల్లో ఎన్నికలు జరిగాయి. మొత్తం 36,526 మంది ఓటర్లకు (పురుషులు 17,450, మహిళలు 19,068, ఇతరులు 8) గాను 27,981 మంది (పురుషులు 13,093, మహిళలు 14,885, ఇతరులు 3) ఓటు హక్కు వినియోగించుకున్నారు. ​నర్సీపట్నం మున్సిపాలిటీ (72.50%): నర్సీపట్నంలో ఏర్పాటు చేసిన 76 పోలింగ్ కేంద్రాల్లో ఓటర్లు తమ తీర్పును వెల్లడించారు. మొత్తం 49,099 మంది ఓటర్లలో (పురుషులు 23,317, మహిళలు 25,778, ఇతరులు 4) 35,597 మంది (పురుషులు 16,909, మహిళలు 18,688) ఓటు వేశారు. ​జీవీఎంసీ వార్డులు (65.53%): జిల్లా పరిధిలోకి వచ్చే జీవీఎంసీ వార్డుల్లో 89 పోలింగ్ కేంద్రాలను ఏర్పాటు చేశారు. మొత్తం 76,950 మంది ఓటర్లకు (పురుషులు 37,079, మహిళలు 39,869, ఇతరులు 2) గాను 50,425 మంది (పురుషులు 23,746, మహిళలు 26,678, ఇతరులు 1) తమ ఓటు హక్కును వినియోగించుకున్నారు. ​ఎన్నికల విధుల్లో పాల్గొన్న అధికారులు, సిబ్బంది, బందోబస్తు నిర్వహించిన పోలీసు యంత్రాంగం సమన్వయంతో బాధ్యతలు నిర్వర్తించడంతో పోలింగ్ ప్రక్రియ సజావుగా సాగిందని జిల్లా అధికార యంత్రాంగం వెల్లడించింది. *జిల్లాలో ఎన్నికలను విజయవంతంగా పూర్తి చేసినందుకు అభినందనలు జిల్లాలో మున్సిపల్ ఎన్నికలను విజయవంతంగా పూర్తి చేసినందుకు ప్రతి ఒక్కరికి హృదయపూర్వక అభినందనలు తెలుపుతూ కలెక్టర్ మరియు జిల్లా ఎన్నికల అధికారి విజయ కృష్ణన్ పత్రికా ముఖంగా తెలియజేశారు. *జిల్లాలో మున్సిపల్ మరియు ఎలమంచిలి నర్సీపట్నం మున్సిపాలిటీలలో ఎన్నికలు విజయవంతంగా ముగిసిన నేపథ్యంలో జిల్లా పోలీసు సూపరింటెండెంట్ (SP)తుహిన్ సిన్హా తో కలిసి సంయుక్తంగా విలేకరుల సమావేశం నిర్వహించారు. ఈ సందర్భంగా జిల్లా కలెక్టర్ మాట్లాడుతూ జిల్లాలో ఎన్నికలు ప్రశాంతంగా, స్వేచ్ఛాయుతంగా, నిష్పక్షపాతంగా మరియు పారదర్శకంగా నిర్వహించబడిన తీరును వివరించారు. పోలింగ్ నిర్వహణకు చేసిన ఏర్పాట్లు, ఎన్నికల సందర్భంగా చేపట్టిన భద్రతా చర్యలు వివరించారు. ఈ సందర్భంగా జిల్లా యంత్రాంగం, పోలీసు శాఖ మరియు ఎన్నికల యంత్రాంగం సమన్వయంతో రాష్ట్ర ఎన్నికల సంఘం ఆదేశాల మేరకు ప్రశాంతమైన వాతావరణంలో ఎన్నికలు నిర్వహించినందుకు అభినందించారు. జిల్లాలో ఎక్కడ రీపోలింగ్ అవకాశం లేదని, జిల్లా వ్యాప్తంగా అధికారులు ధృవీకరించిన నివేదికల ప్రకారం జిల్లాలో ఎటువంటి అవాంఛనీయ సంఘటనలు లేకుండా ఎన్నికలు ప్రశాంతంగా నిర్వహించడం జరిగిందని జిల్లా కలెక్టర్ స్పష్టం చేశారు. *అదేవిధంగా, ఎన్నికల నిర్వహణకు సహకరించిన ఓటర్లు, పోలింగ్ సిబ్బంది, పోలీసు సిబ్బంది, మీడియా ప్రతినిధులు మరియు ఇతర భాగస్వాములందరికీ ప్రత్యేకంగా కృతజ్ఞతలు తెలియజేస్తున్నట్లు కలెక్టర్ తెలిపారు.

ముంబై: జీవితంలో ఉన్నత శిఖరాలను అధిరోహించడానికి, వ్యాపార రంగంలో లేదా కెరీర్‌లో గొప్ప విజయాలు సాధించడానికి పెద్ద ఆలోచనలతో పాటు నిరంతర శ్రమ ఎంతో అవసరమని రిలయన్స్ ఇండస్ట్రీస్ అధినేత ముఖేష్ అంబానీ స్పష్టం చేశారు. తన జీవిత ప్రయాణంలో నేర్చుకున్న మూడు ప్రాథమిక విజయ సూత్రాలను ఆయన యువత, ఔత్సాహిక పారిశ్రామికవేత్తలతో పంచుకున్నారు. 1. లక్ష్యంపైనే దృష్టి – అడ్డంకులు దాటే మార్గం "మొదటగా పెద్ద కలలు కనండి. మీ ఆలోచన ఎల్లప్పుడూ తుది లక్ష్యంపైనే స్థిరంగా ఉండాలి" అని అంబానీ పేర్కొన్నారు. ప్రయాణంలో ఎన్ని ఆటంకాలు, సవాళ్లు ఎదురైనా లక్ష్యాన్ని మరువకుండా ముందడుగు వేస్తే వాటన్నింటినీ అధిగమించవచ్చని, అలా కాకుండా అడ్డంకుల గురించే ఆలోచిస్తూ కూర్చుంటే అనుకున్న గమ్యాన్ని ఎప్పటికీ చేరుకోలేమని ఆయన హెచ్చరించారు. 2. కష్టపడి పనిచేయడానికి ప్రత్యామ్నాయం లేదు విజయానికి ఎలాంటి సులువైన దారులు ఉండవని, కఠిన శ్రమ ఒక్కటే శాశ్వత విజయానికి పునాది అని ఆయన వివరించారు. పోటీ పడేటప్పుడు స్థానికంగా లేదా దేశంలోనే మేటిగా ఉండటమే కాకుండా, ప్రపంచ స్థాయి ప్రమాణాలను అందుకొని 'ప్రపంచంలోనే బెస్ట్'గా నిలవడమే అసలైన లక్ష్యం కావాలని సూచించారు. 3. ఆత్మవిశ్వాసమే అసలైన బలం జీవితంలో ఎన్ని ఒడిదొడుకులు ఎదురైనా ఎల్లప్పుడూ సానుకూల దృక్పథం (పాజిటివ్ మైండ్‌సెట్) కలిగి ఉండటం అత్యంత కీలకమని అంబానీ తెలిపారు. మిమ్మల్ని మీరు పూర్తిగా నమ్మినప్పుడే, ఆత్మవిశ్వాసంతో ముందడుగు వేసినప్పుడే అనుకున్న అసాధ్యాలను సుసాధ్యం చేయవచ్చని ఆయన ఉద్ఘాటించారు.

అనకాపల్లి, ప్రజాముద్ర ప్రతినిధి: రాష్ట్రంలో ఎన్డీయే కూటమి ప్రభుత్వం అధికారంలోకి వచ్చిన తర్వాత చేపట్టిన సంక్షేమ, అభివృద్ధి కార్యక్రమాలను విస్తృతంగా ప్రజల్లోకి తీసుకెళ్లాలని రాష్ట్ర అర్బన్ ఫైనాన్స్ అండ్ ఇన్‌ఫ్రాస్ట్రక్చర్ డెవలప్‌మెంట్ కార్పొరేషన్ చైర్మన్, మాజీ ఎమ్మెల్యే, టీడీపీ నియోజకవర్గ ఇన్‌చార్జి పీలా గోవింద సత్యనారాయణ పిలుపునిచ్చారు. శుక్రవారం అనకాపల్లి పరిధిలోని 107వ వార్డు సిరసపల్లి, 110వ వార్డు రోటరీ క్లబ్ వద్ద నిర్వహించిన అవగాహన సదస్సుల్లో స్థానిక శాసనసభ్యులు కొణతాల రామకృష్ణతో కలిసి ఆయన పాల్గొన్నారు. ​ఈ సందర్భంగా పీలా గోవింద సత్యనారాయణ మాట్లాడుతూ.. ఎన్నికల్లో ఇచ్చిన ప్రతి హామీని నెరవేర్చే దిశగా కూటమి ప్రభుత్వం చిత్తశుద్ధితో పనిచేస్తోందన్నారు. ‘సూపర్ సిక్స్’ పథకాలతో పాటు నిరుద్యోగుల చిరకాల స్వప్నమైన మెగా డీఎస్సీని పట్టాలెక్కించి చెప్పిన మాటను నిలబెట్టుకున్నామని స్పష్టం చేశారు. రాష్ట్రంలో నిరంతర అభివృద్ధి, సంస్కరణలు సమర్థవంతంగా సాగాలంటే రాజకీయ స్థిరత్వం అత్యంత కీలకమని, దీర్ఘకాలిక ప్రయోజనాల కోసం ప్రజలు కూటమి ప్రభుత్వానికి అండగా నిలవాలని కోరారు. ​అభివృద్ధికి ఎన్డీయే.. విధ్వంసానికి వైసీపీ: గత వైసీపీ ప్రభుత్వ హయాంలో రాష్ట్రం తీవ్ర విధ్వంసానికి గురైందని, కూటమి పాలనలో సుపరిపాలన, పారదర్శకతతో పునర్నిర్మాణం జరుగుతోందని పేర్కొన్నారు. కేంద్రం, రాష్ట్రం, స్థానిక సంస్థల కలయికతో ‘ట్రిపుల్ ఇంజిన్’ తరహా పాలన సాగితేనే పథకాల లబ్ధి ప్రతి అర్హుడికీ వేగంగా చేరుతుందని చెప్పారు. అలాగే ప్రజాసేవ పట్ల అంకితభావం కలిగిన విద్యావంతులు, యువతకు రాబోయే రోజుల్లో కూటమిలోని మూడు పార్టీలు పెద్దపీట వేస్తాయని తెలిపారు. ​ఇటీవల ముంచుకొచ్చిన ‘అర్నబ్’ తుఫాను ముప్పును ఎదుర్కోవడంలో ప్రభుత్వం చేపట్టిన ముందస్తు జాగ్రత్తలు, యంత్రాంగం సమన్వయంతో ప్రజలకు ప్రాణ, ఆస్తి నష్టం కలగకుండా రక్షించగలిగామని వివరించారు. కూటమి ప్రభుత్వ విజయాలను ప్రతి గడపకూ చేరవేస్తూ, రాబోయే స్థానిక సంస్థల ఎన్నికల్లో కూటమి అభ్యర్థుల గెలుపే లక్ష్యంగా నాయకులు, కార్యకర్తలు క్షేత్రస్థాయిలో సమన్వయంతో పనిచేయాలని సూచించారు. ఈ కార్యక్రమంలో స్థానిక కూటమి నాయకులు, కార్యకర్తలు, ప్రజలు పాల్గొన్నారు.

అనకాపల్లి (ప్రజా ముద్ర ప్రతినిధి): జీవీఎంసీ పరిధిలో నెలకొన్న స్థానిక సమస్యల పరిష్కారం, వార్డుల సమగ్ర అభివృద్ధి కూటమి కూటమి అభ్యర్థుల విజయంతోనే సాధ్యమని మాజీ మంత్రి, అనకాపల్లి ఎమ్మెల్యే కొణతాల రామకృష్ణ స్పష్టం చేశారు. జీవీఎంసీ స్థానిక సంస్థల ఎన్నికల నేపథ్యంలో శుక్రవారం ఆయన 109వ వార్డులో విస్తృతంగా ఎన్నికల ప్రచారం నిర్వహించారు. ​వార్డు పరిధిలోని విజయరామరాజుపేట వీధులు, పరిసర ప్రాంతాల్లో కూటమి కార్పొరేటర్ అభ్యర్థి బుద్ధ జ్యోతి శ్రీనివాస్‌తో కలిసి ఇంటింటికీ వెళ్లి ప్రజలను ప్రత్యక్షంగా కలిశారు. స్థానికుల సమస్యలను అడిగి తెలుసుకుంటూ, కూటమి లక్ష్యాలను వివరించారు. ​ఈ సందర్భంగా ఎమ్మెల్యే కొణతాల రామకృష్ణ మాట్లాడుతూ.. ప్రజా సంక్షేమం, ప్రాంతీయ అభివృద్ధి ధ్యేయంగా పనిచేస్తున్న కూటమి అభ్యర్థి బుద్ధ జ్యోతి శ్రీనివాస్‌ను అత్యధిక మెజారిటీతో గెలిపించాలని ఓటర్లను కోరారు. వార్డులో తాగునీరు, డ్రైనేజీ, రహదారుల వంటి మౌలిక వసతుల కల్పనకు తమ వంతు కృషి చేస్తామని హామీ ఇచ్చారు. కూటమి బలపరిచిన అభ్యర్థికి పూర్తి మద్దతు తెలిపి అఖండ విజయాన్ని అందించాలని విజ్ఞప్తి చేశారు. ​ఈ కార్యక్రమంలో కార్పొరేషన్ చైర్మన్ మల్ల సురేంద్రతో పాటు వార్డుకు చెందిన కూటమి ముఖ్య నాయకులు, కార్యకర్తలు, స్థానికులు పెద్ద ఎత్తున పాల్గొన్నారు.

కసింకోట:రాష్ట్రంలో కూటమి ప్రభుత్వం అభివృద్ధి, సంక్షేమాన్ని రెండు కళ్లుగా భావిస్తూ సమగ్ర ప్రగతికి బాటలు వేస్తోందని కూటమి ముఖ్య నాయకులు పొన్నగంటి అప్పారావు స్పష్టం చేశారు. స్థానిక సంస్థల ఎన్నికల ప్రచారంలో భాగంగా అనకాపల్లి ఎమ్మెల్యే, మాజీ మంత్రి కొణతాల రామకృష్ణ, అనకాపల్లి ఎంపీ సీఎం రమేశ్, రాష్ట్ర అర్బన్ ఫైనాన్స్ అండ్ ఇన్‌ఫ్రాస్ట్రక్చర్ డెవలప్‌మెంట్ కార్పొరేషన్ చైర్మన్, మాజీ ఎమ్మెల్యే పీలా గోవింద సత్యనారాయణల ఆదేశాల మేరకు మండలంలోని పలు గ్రామాల్లో కూటమి జడ్పీటీసీ, ఎంపీటీసీ అభ్యర్థుల తరఫున ఆయన విస్తృత ప్రచారం నిర్వహించారు. ​బుధవారం తేగడ, కొత్తపల్లి, జమాదులపాలెం, విస్సన్నపేట, రామన్నపాలెం గ్రామాల్లో అభ్యర్థులతో కలిసి ఇంటింటి ప్రచారం చేపట్టారు. ఈ సందర్భంగా ప్రజలు కూటమి శ్రేణులకు ఘన స్వాగతం పలికారు. ​ఈ సందర్భంగా పొన్నగంటి అప్పారావు మాట్లాడుతూ.. కూటమి ప్రభుత్వం అధికారంలోకి వచ్చిన నాటి నుంచి అమలు చేస్తున్న సంక్షేమ పథకాలు, చేపడుతున్న అభివృద్ధి పనులు నేడు ప్రజల కళ్ల ముందే సాక్షాత్కరిస్తున్నాయని తెలిపారు. దేశంలోనే ఏ రాష్ట్రంలోనూ లేని రీతిలో అర్హులైన పేదలకు రికార్డు స్థాయిలో పింఛన్లు అందిస్తున్న ఘనత ముఖ్యమంత్రి నారా చంద్రబాబు నాయుడుకే దక్కుతుందన్నారు. ప్రధాని నరేంద్ర మోదీ, సీఎం చంద్రబాబు, డిప్యూటీ సీఎం పవన్ కల్యాణ్ సంయుక్త సారథ్యంలో పల్లెల్లో మునుపెన్నడూ లేని విధంగా నిధులు వెచ్చించి మౌలిక వసతులు కల్పిస్తున్నామని పేర్కొన్నారు. గ్రామాల సమగ్ర వికాసం కూటమి అభ్యర్థుల విజయంతోనే సాధ్యమని, ఓటర్లంతా భారీ మెజారిటీతో ఆశీర్వదించాలని కోరారు. ​తరలివచ్చిన నాయకులు, శ్రేణులు: ఈ కార్యక్రమంలో రాష్ట్ర తెలుగు రైతు ప్రధాన కార్యదర్శి ఉగ్గిని రమణమూర్తి, జిల్లా టీడీపీ ఉపాధ్యక్షులు కాయల మురళీధర్, జనసేన పార్టీ నాయకులు కర్రి సత్యనారాయణ, ఉమ్మి సత్యనారాయణ, ఎంపీటీసీ అభ్యర్థులు గొర్ల దత్తాత్రేయ, కట్టోజు సాయిలక్ష్మి పాల్గొన్నారు. అలాగే మాజీ సర్పంచులు సిద్దిరెడ్డి సూర్యనారాయణ, బుధిరెడ్డి గంగయ్య, తిర్రి చిరంజీవి, బద్ది గోవింద, మండల ఐ-టీడీపీ అధ్యక్షులు జెర్రీపోతుల నూకునాయుడు, మాజీ ఎంపీటీసీ షేక్ బాబర్, స్థానిక నాయకులు గొల్లవిల్లి ప్రవీణ్, సిదిరెడ్డి శ్రీను, మండే శ్రీను, బత్తిన రమణ, పప్పు ఈశ్వరరావుతో పాటు భారీ సంఖ్యలో కూటమి కార్యకర్తలు, గ్రామ పెద్దలు, మహిళలు పాల్గొన్నారు.

అనకాపల్లి:(ప్రజాముద్ర)జీవీఎంసీ 111వ వార్డు పరిధిలోని భీముని గుమ్మం వీధిలో కూటమి నాయకులు విస్తృతంగా ఇంటింటి ఎన్నికల ప్రచారం నిర్వహించారు. ఈ సందర్భంగా ఆంధ్రప్రదేశ్ రాష్ట్ర ఎస్సీ కార్పొరేషన్ డైరెక్టర్, టీడీపీ రాష్ట్ర ఎస్సీ సెల్ ప్రధాన కార్యదర్శి సబ్బవరపు గణేష్ స్వయంగా ఓటర్ల ఇళ్లకు వెళ్లి ప్రచారం చేపట్టారు. ​రాబోయే ఎన్నికల్లో బ్యాలెట్ పేపర్‌పై ఓటు ఏ విధంగా వేయాలో వృద్ధులకు, కొత్తగా ఓటు హక్కు పొందిన యువతీ యువకులకు నమూనా పత్రాల ద్వారా ఆయన వివరించారు. కూటమి బలపరిచిన బీజేపీ కార్పొరేటర్ అభ్యర్థి పలక యశోదకు ‘కమలం’ గుర్తుపై, కూటమి టీడీపీ మేయర్ అభ్యర్థి డాక్టర్ ముక్కా శ్రావణికి ‘సైకిల్’ గుర్తుపై ఓటు వేసి భారీ మెజారిటీతో గెలిపించాలని ఆయన స్థానికులను కోరారు. వార్డు అభివృద్ధి కూటమి అభ్యర్థుల గెలుపుతోనే సాధ్యమవుతుందని ఈ సందర్భంగా పేర్కొన్నారు. ​ఈ కార్యక్రమంలో టీడీపీ వార్డు మాజీ అధ్యక్షుడు పోతల శ్రీను, బూత్ ఇంచార్జ్ సిమిటి రామకృష్ణ, నాయకులు దౌర్ల కిషోర్ కుమార్, శ్రీ జగన్నాథ స్వామి దేవస్థానం ధర్మకర్త ఎల్లబెల్లి కనకతో పాటు పలువురు కూటమి ముఖ్య నాయకులు, కార్యకర్తలు పాల్గొన్నారు.

(అనకాపల్లి): జీవీఎంసీ 110వ వార్డు పరిధిలో వైఎస్సార్సీపీ కార్పొరేటర్ అభ్యర్థి ఉగ్గిన జ్యోత్స్న పద్మజ విజయానికి మద్దతుగా ఆమె భర్త, పార్టీ యువజన విభాగం రాష్ట్ర సంయుక్త కార్యదర్శి ఉగ్గిన అప్పారావు విస్తృతంగా ప్రచారం నిర్వహించారు. గురువారం సాయంత్రం వార్డు పరిధిలోని ఊడ్ పేట నాయిళ్ళ వీధి, కొండపల్లి వారి వీధి తదితర ప్రాంతాల్లో వైఎస్సార్సీపీ పట్టణ శాఖ అధ్యక్షుడు మందపాటి జానకిరామరాజు ఆధ్వర్యంలో పార్టీ శ్రేణులతో కలిసి ఇంటింటికీ తిరుగుతూ ఓటర్లను నేరుగా కలుసుకున్నారు. స్థానిక సమస్యలను అడిగి తెలుసుకుంటూ కరపత్రాలను పంపిణీ చేశారు. ఈ సందర్భంగా ఉగ్గిన అప్పారావు మాట్లాడుతూ.. ప్రజాసేవ చేయాలనే బలమైన సంకల్పంతోనే తన సతీమణి ఎన్నికల బరిలో నిలిచారని, ఫ్యాన్ గుర్తుపై ఓటు వేసి ఆమెను అత్యధిక మెజారిటీతో గెలిపించాలని కోరారు. జ్యోత్స్న గెలుపు వార్డు అభివృద్ధికి సరికొత్త మలుపు కానుందని పేర్కొన్నారు. తాము ఎల్లప్పుడూ ప్రజలకు అందుబాటులో ఉంటూ తాగునీరు, పారిశుద్ధ్యం, రోడ్లు వంటి మౌలిక సదుపాయాల సమస్యల పరిష్కారానికి మొదటి ప్రాధాన్యత ఇస్తామని, వార్డును ఆదర్శవంతంగా తీర్చిదిద్దడమే తమ ధ్యేయమని స్పష్టం చేశారు. 110వ డివిజన్ వైకాపా ఎన్నికల ఇంచార్జ్ శ్రీధరాల మనోజ్ పర్యవేక్షణలో జరిగిన ఈ కార్యక్రమంలో పార్టీ నాయకులు కోన ఉమ, కోటపాడు శివ, ఈతలపాక శివ, జెట్టి శ్రీను, గుండా గుప్తా, కొడుకుల సుబ్రహ్మణ్యం, కోలా గణేష్, చింతా రాంజీ, సతీష్ రెడ్డి, డేనియల్, కోలా సూర్యనారాయణ, మొగలపల్లి సుబ్బారావు తదితరులతో పాటు పెద్ద సంఖ్యలో పార్టీ కార్యకర్తలు, స్థానికులు పాల్గొన్నారు.

అనకాపల్లి:(ప్రజాముద్ర) మండల సమగ్ర అభివృద్ధికి, స్థానిక సమస్యల శాశ్వత పరిష్కారానికి జడ్పీటీసీగా తనకు ఒక అవకాశం ఇచ్చి ఆశీర్వదించాలని బహుజన్ సమాజ్ పార్టీ (BSP) బలపరిచిన అభ్యర్థి సూదికొండ మాణిక్యాలరావు ప్రజలను కోరారు. ​మండల పరిధిలోని కొత్తూరు గ్రామంలో ఆయన విస్తృతంగా ఎన్నికల ప్రచారం నిర్వహించారు. ఇంటింటికీ తిరిగి ప్రజలను కలుసుకుంటూ ఎన్నికల ప్రచార కరపత్రాలను పంపిణీ చేశారు. ఈ సందర్భంగా ఆయన మాట్లాడుతూ.. మండలంలోని గ్రామీణ ప్రాంతాలు ఇప్పటికీ మౌలిక వసతుల లేమితో కొట్టుమిట్టాడుతున్నాయని ఆవేదన వ్యక్తం చేశారు. ప్రజా సమస్యల పరిష్కారమే లక్ష్యంగా తాను నిరంతరం ప్రజలకు అందుబాటులో ఉంటానని, ఈ ఎన్నికల్లో ఏనుగు గుర్తుకు ఓటు వేసి తనను భారీ మెజారిటీతో గెలిపించాలని ఓటర్లకు విజ్ఞప్తి చేశారు. ​ఈ కార్యక్రమంలో బహుజన్ సమాజ్ పార్టీ నాయకులు, కార్యకర్తలు, అభిమానులు పాల్గొన్నారు.

అనకాపల్లి:)ప్రజాముద్ర)ఈనెల 5వ తేదీన జరగనున్న జడ్పీటీసీ, ఎంపీటీసీ ఎన్నికల్లో సీపీఎం, వామపక్షాల అభ్యర్థులను అత్యధిక మెజారిటీతో గెలిపించాలని సీఐటీయూ జిల్లా అధ్యక్ష, ప్రధాన కార్యదర్శులు వి.వి. శ్రీనివాసరావు, రుత్తల శంకర్రావు కార్మికులకు, ప్రజలకు విజ్ఞప్తి చేశారు. స్థానిక సీఐటీయూ జిల్లా కార్యాలయంలో జిల్లా ఉపాధ్యక్షుడు గంటా శ్రీరామ్, జిల్లా కమిటీ సభ్యులు కె.ఈశ్వరరావులతో కలిసి అభ్యర్థుల జాబితా, ఫొటోలతో కూడిన పోస్టర్‌ను వారు ఆవిష్కరించారు. ​ఈ సందర్భంగా నాయకులు మాట్లాడుతూ.. కార్మికులు, శ్రామిక ప్రజల పక్షాన నిరంతరం పోరాడుతున్న సీపీఎం, వామపక్షాల అభ్యర్థుల గెలుపు స్థానిక సంస్థల్లో ప్రజల గొంతుకను బలంగా వినిపించడానికి ఎంతో అవసరమని పేర్కొన్నారు. రాష్ట్రంలో అధికారంలో ఉన్న టీడీపీ–జనసేన–బీజేపీ కూటమి ప్రభుత్వం గత రెండున్నరేళ్లుగా కార్మిక వ్యతిరేక విధానాలను అమలు చేస్తోందని విమర్శించారు. పెరుగుతున్న నిత్యావసర ధరలకు అనుగుణంగా వేతనాలు పెంచాలని కోరితే పట్టించుకోలేదని, కాంట్రాక్ట్, ఔట్‌సోర్సింగ్ ఉద్యోగులను ఆప్కాస్ (APCOS) నుంచి తప్పించి తిరిగి ప్రైవేట్ ఏజెన్సీలకు అప్పగించే చర్యలు చేపట్టారని ఆరోపించారు. రోజుకు 8 గంటల పని దినాన్ని 12 గంటలకు పెంచేలా కేంద్రం తెచ్చిన నాలుగు లేబర్ కోడ్లను అమలు చేయడానికి పూనుకున్నారని మండిపడ్డారు. ​ఈ నేపథ్యంలో ప్రజా వ్యతిరేక విధానాలను అమలు చేస్తున్న కూటమి అభ్యర్థులను ఎన్నికల్లో చిత్తుగా ఓడించాలని పిలుపునిచ్చారు. జిల్లాలో సీపీఎం తరఫున అనకాపల్లి, అచ్యుతాపురం, రాంబిల్లి, నక్కపల్లి, రోలుగుంట, గొలుగొండ మండలాల్లో జడ్పీటీసీ అభ్యర్థులుగా, మరో 12 స్థానాల్లో ఎంపీటీసీ అభ్యర్థులుగా పోటీ చేస్తున్నారని, పలుచోట్ల సీపీఐ అభ్యర్థులు బరిలో ఉన్నారని తెలిపారు. కార్మిక వర్గం, ప్రజాస్వామ్యవాదులు తమ అమూల్యమైన ఓట్లను వామపక్ష అభ్యర్థులకు వేసి భారీ మెజారిటీతో గెలిపించాలని కోరారు.

అనకాపల్లి (ప్రజాముద్ర ప్రతినిధి): అనకాపల్లి జీవీఎంసీలో విలీనమై, నూతన జిల్లాగా ఏర్పడి ఏళ్లు గడుస్తున్నా పట్టణంలో ట్రాఫిక్ సమస్యలు పరిష్కారం కాకపోవడంపై సర్వత్రా ఆందోళన వ్యక్తమవుతోంది. నిత్యం ట్రాఫిక్ ఇబ్బందులతో సతమతమవుతున్న జిల్లా, పట్టణ ప్రజలకు తక్షణమే రక్షణ కల్పించాలని డిమాండ్ చేస్తూ స్థానిక జీవీఎంసీ జోనల్ కమిషనర్ కార్యాలయం వద్దనున్న మహాత్మా గాంధీ విగ్రహం ఎదుట సిద్ధార్థ సోషల్ సర్వీస్ & కల్చరల్ అసోసియేషన్ ఆధ్వర్యంలో సభ్యులు, సీనియర్ సిటిజన్లు ప్లకార్డులతో నిరసన ప్రదర్శన నిర్వహించారు. ఈ సందర్భంగా అసోసియేషన్ అధ్యక్షులు బల్లా నాగభూషణం మాట్లాడుతూ, రోజురోజుకూ పెరుగుతున్న జనాభా, వాహనాల రద్దీకి తగ్గట్లుగా సరైన ట్రాఫిక్ నియంత్రణ వ్యవస్థ లేకపోవడం శోచనీయమన్నారు. రోడ్లపైకి రావాలంటేనే ప్రజలు వణికిపోతున్నారని, రోజూ ఎక్కడో ఒకచోట ప్రమాదాలు జరిగి అమాయకులు ప్రాణాలు కోల్పోవడం, క్షతగాత్రులు కావడం తీవ్ర విచారకరమని ఆవేదన వ్యక్తం చేశారు. అధికారుల పర్యవేక్షణ లోపం: పట్టణంలోని ప్రధాన కూడళ్లలో ట్రాఫిక్ సిగ్నల్స్ లేకపోవడం, ట్రాఫిక్ పోలీసుల పర్యవేక్షణ లోపం కొట్టొచ్చినట్లు కనిపిస్తోందని విమర్శించారు. జీవీఎంసీ అధికారుల నిర్లక్ష్యం వల్ల పాదచారుల కోసం ఏర్పాటు చేసిన ఫుట్‌పాత్‌లు ఆక్రమణలకు గురై వ్యాపారాలు సాగుతున్నాయని, భవనాల సెల్లార్లలో సైతం వాణిజ్య కార్యకలాపాలు నిర్వహిస్తుండటంతో వాహనాల పార్కింగ్‌కు స్థలం లేకుండా పోయిందన్నారు. అలాగే తోపుడు బండ్లు, చిరు దుకాణాల వారికి ప్రత్యేక స్థలాలు కేటాయించకుండా రోడ్లపైనే వ్యాపారాలు చేసుకునేలా వదిలేయడం, ఆర్‌టీవో అధికారుల నిర్లిప్తత, పట్టణంలో వన్‌వే వ్యవస్థను అమలు చేయకపోవడం వల్లే ట్రాఫిక్ సమస్య జటిలమైందని పేర్కొన్నారు. గత పదేళ్లుగా ఈ సమస్యల పరిష్కారానికై సిద్ధార్థ అసోసియేషన్ ఆధ్వర్యంలో అనేక కార్యక్రమాలు నిర్వహించినా అధికారులు పట్టించుకోకపోవడం దారుణమన్నారు. ఇప్పటికైనా జిల్లా కలెక్టర్, పోలీస్ యంత్రాంగం, జీవీఎంసీ, ఆర్‌టీవో అధికారులు తక్షణమే స్పందించి పటిష్టమైన ట్రాఫిక్ నియంత్రణ చర్యలు చేపట్టి ప్రజల ప్రాణాలకు భద్రత కల్పించాలని డిమాండ్ చేశారు. ఈ నిరసన కార్యక్రమంలో సిద్ధార్థ అసోసియేషన్ కార్యదర్శి వినకోట నీలేష్ గుప్తా, సభ్యులు అయ్యగారు వెంకటరమణమూర్తి, పొట్టి శ్రీరాములు భవన్ సంస్థ చైర్మన్ పిరాట్ల నరసింహమూర్తి, సీనియర్ సిటిజన్ సంస్థ సభ్యులు, విశ్రాంత ప్రభుత్వ ఉద్యోగులు తదితరులు పాల్గొన్నారు

అనకాపల్లి (ప్రజాముద్ర): జీవీఎంసీ ఎన్నికల్లో కూటమి అభ్యర్థులను అత్యధిక మెజారిటీతో గెలిపించి అనకాపల్లి అభివృద్ధికి బాటలు వేయాలని ఆంధ్రప్రదేశ్ రాష్ట్ర ఎస్సీ కార్పొరేషన్ డైరెక్టర్, తెలుగుదేశం పార్టీ రాష్ట్ర ఎస్సీ సెల్ ప్రధాన కార్యదర్శి సబ్బవరపు గణేష్ పిలుపునిచ్చారు. అనకాపల్లి శాసనసభ్యులు కొణతాల రామకృష్ణ, అనకాపల్లి ఎంపీ సీఎం రమేష్, అర్బన్ డెవలప్‌మెంట్ ఇన్ఫ్రాస్ట్రక్చర్ ఫైనాన్స్ కార్పొరేషన్ చైర్మన్ పీలా గోవింద్ సత్యనారాయణ, కూటమి రథసారథి భీమరశెట్టి రామ్కి ఆదేశాల మేరకు అనకాపల్లి పట్టణంలోని 110, 111 వార్డుల్లో బుధవారం విస్తృతంగా ఎన్నికల ప్రచారం నిర్వహించారు. ​110వ వార్డులో అభివృద్ధిని వివరిస్తూ ప్రచారం: 110వ వార్డు పరిధిలోని ఆర్టీసీ కాంప్లెక్స్ సమీపంలో గల పెద్ద రెల్లి వీధిలో నిర్వహించిన ప్రచారంలో సబ్బవరపు గణేష్ పాల్గొన్నారు. ఈ సందర్భంగా ఆయన మాట్లాడుతూ, ఎమ్మెల్యే కొణతాల రామకృష్ణ ప్రత్యేక చొరవతో 110, 112 డివిజన్లలో దాదాపు ₹1.60 కోట్ల నిధులతో శ్రీరామ్ నగర్, ఏఎంసీ కాలనీ, పెదరెల్లి వీధుల్లో సామాజిక భవనాల నిర్మాణానికి శంకుస్థాపన చేశారని గుర్తుచేశారు. నియోజకవర్గ అభివృద్ధికి పాటుపడుతున్న కూటమికి మద్దతుగా నిలవాల్సిన బాధ్యత ప్రజలపై ఉందని అన్నారు. ​ఈ ఎన్నికల్లో కూటమి జనసేన కార్పొరేటర్ అభ్యర్థి తాడి శాంత కుమారిని 'గాజు గ్లాస్' గుర్తుపై, కూటమి టీడీపీ మేయర్ అభ్యర్థి డాక్టర్ ముక్క శ్రావణిని 'సైకిల్' గుర్తుపై ఓటు వేసి గెలిపించాలని ఓటర్లను అభ్యర్థించారు. ​111వ వార్డులో ఇంటింటి ప్రచారం: అనంతరం 111వ వార్డు పరిధిలోని భీముని గుమ్మం వీధి (185, 186 పోలింగ్ కేంద్రాల పరిధి) లో నాయకులు ఇంటింటి ప్రచారం నిర్వహించారు. కూటమి బీజేపీ కార్పొరేటర్ అభ్యర్థి పలక యశోదకు 'కమలం' గుర్తుపై, మేయర్ అభ్యర్థి డాక్టర్ ముక్క శ్రావణికి 'సైకిల్' గుర్తుపై ఓట్లు వేసి ఆశీర్వదించాలని కోరారు. ​ఈ కార్యక్రమంలో జిల్లా తెలుగు మహిళా ఉపాధ్యక్షురాలు కాయల ప్రసన్నలక్ష్మి, శ్రీ వెంకటేశ్వర స్వామి దేవస్థానం మాజీ ధర్మకర్త ఎల్లబెల్లి ధనలక్ష్మి, స్థానిక మహిళలు, కూటమి శ్రేణులు మరియు కార్యకర్తలు పెద్ద సంఖ్యలో పాల్గొన్నారు.

ప్రజాముద్ర, అనకాపల్లి: జిల్లాలో దూసుకొస్తున్న "ఆర్నాబ్" తుఫాను ప్రభావం నేపథ్యంలో, ముందస్తు రక్షణ మరియు సహాయక చర్యల కోసం రూ. 2,05,50,000/- (రెండు కోట్ల ఐదు లక్షల యాభై వేల రూపాయలు) ముందస్తు నిధులను విడుదల చేసినట్లు అనకాపల్లి జిల్లా కలెక్టర్ విజయ కృష్ణన్ తెలిపారు. తుఫాను ముంచుకొస్తున్న తరుణంలో ప్రజలకు ఎలాంటి ఇబ్బందులు కలగకుండా, తక్షణ సహాయక చర్యలు చేపట్టేందుకు వివిధ ప్రభుత్వ శాఖలకు, అధికారులకు ఈ నిధులను కేటాయించినట్లు ఆమె స్పష్టం చేశారు. ​శాఖల వారీగా కేటాయించిన నిధుల వివరాలు: ​రెవెన్యూ అధికారులు: 24 మంది తహశీల్దార్లకు రూ. 86 లక్షలు, ముగ్గురు ఆర్డీవోలకు రూ. 21 లక్షలు, అనకాపల్లి కలెక్టరేట్‌కు రూ. 3 లక్షలు. ​స్థానిక సంస్థలు: 24 మంది ఎంపీడీవోలకు (ఒక్కొక్కరికి రూ. 1.00 లక్ష చొప్పున) రూ. 24 లక్షలు. ​భద్రత & రక్షణ: రోడ్లు మరియు భవనాల శాఖ (R&B) ఈఈకి రూ. 20 లక్షలు, జిల్లా ఎస్పీ (SP) కి రూ. 5 లక్షలు, జిల్లా అగ్నిమాపక అధికారికి రూ. 5 లక్షలు. ​తాగునీరు & సాగునీరు: నీటిపారుదల శాఖ ఈఈ (చోడవరం & నర్సీపట్నం, రూ. 5 లక్షల చొప్పున) రూ. 10 లక్షలు, పంచాయతీ రాజ్ ఈఈ (అనకాపల్లి & నర్సీపట్నం, రూ. 5 లక్షల చొప్పున) రూ. 10‌ లక్షలు, గ్రామీణ నీటి సరఫరా (RWS) ఈఈకి రూ. 5 లక్షలు. ​వ్యవసాయం & అనుబంధ రంగాలు: జిల్లా వ్యవసాయ శాఖ అధికారికి రూ. 5 లక్షలు, జిల్లా మత్స్యశాఖ అధికారికి రూ. 2 లక్షలు, ఉద్యానవన శాఖ అధికారికి రూ. 1 లక్ష, పట్టు పరిశ్రమ శాఖ అధికారికి రూ. 50 వేలు. ​వైద్యారోగ్య శాఖ: జిల్లా ఆసుపత్రుల సమన్వయకర్తకు (DCHS) రూ. 3 లక్షలు, నర్సీపట్నం ఏరియా ఆసుపత్రికి రూ. 2 లక్షలు, అన్ని సామాజిక ఆరోగ్య కేంద్రాలకు (CHCs, ఒక్కోదానికి రూ. 50,000 చొప్పున) రూ. 3 లక్షలు. ​తుఫాను తీవ్రతను దృష్టిలో ఉంచుకుని అన్ని శాఖల అధికారులు క్షేత్రస్థాయిలో అప్రమత్తంగా ఉండాలని, బాధితులకు తక్షణమే సహాయం అందేలా చర్యలు తీసుకోవాలని జిల్లా కలెక్టర్ విజయ కృష్ణన్ ఆదేశించారు.

ప్రజాముద్ర, అనకాపల్లి: అనకాపల్లి జిల్లాలో స్థానిక సంస్థల ఎన్నికల ప్రక్రియ ఊపందుకుంది. రాష్ట్ర ఎన్నికల కమిషన్ ఆదేశాల మేరకు జిల్లాలో జడ్పీటీసీ, ఎంపీటీసీ ఎన్నికల పోలింగ్, కౌంటింగ్ తేదీల్లో మార్పులు చేసినట్లు జిల్లా ఎన్నికల అధికారి, జిల్లా కలెక్టర్ విజయ కృష్ణన్ తెలిపారు. సవరించిన షెడ్యూల్ ప్రకారం నవంబర్ 5వ తేదీన ఉదయం 7:00 గంటల నుండి సాయంత్రం 5:00 గంటల వరకు పోలింగ్ జరుగుతుంది. అనంతరం నవంబర్ 7వ తేదీన ఉదయం 8:00 గంటల నుంచి ఓట్ల లెక్కింపు చేపట్టి, కౌంటింగ్ పూర్తయిన వెంటనే ఫలితాలను ప్రకటిస్తారు. ఎన్నికల బరిలో అభ్యర్థుల వివరాలు: జిల్లాలోని మొత్తం 24 జడ్పీటీసీ స్థానాలకు 80 మంది అభ్యర్థులు పోటీ పడుతున్నారు. అలాగే 427 ఎంపీటీసీ స్థానాలకు గాను రెండు స్థానాలు ఏకగ్రీవం కాగా, మిగిలిన 425 స్థానాలకు 979 మంది అభ్యర్థులు రంగంలో నిలిచారు. రెండు స్థానాలు ఏకగ్రీవం: ఎస్.రాయవరం మండలంలోని పెద్ద గుమ్మలూరు ఎంపీటీసీ స్థానం నుంచి తెలుగుదేశం పార్టీ అభ్యర్థి ఏజర్ల అనిల్ వర్మ ఏకగ్రీవంగా ఎన్నికయ్యారు. అలాగే అచ్యుతాపురం మండలం దిబ్బపాలెం-1 ఎంపీటీసీ స్థానానికి వైఎస్సార్ కాంగ్రెస్ పార్టీ అభ్యర్థిని శ్రీమతి లాలం నాగలక్ష్మి ఏకగ్రీవమైనట్లు కలెక్టర్ వెల్లడించారు. ఎన్నికలు ప్రశాంత వాతావరణంలో జరిగేలా అన్ని ఏర్పాట్లు పూర్తి చేస్తున్నామని తెలిపారు.

అనకాపల్లి (ప్రజాముద్ర ప్రతినిధి): అనకాపల్లి జీవీఎంసీ (GVMC) పరిధిలో ఎన్నికల ప్రచారం ఊపందుకుంది. కూటమి అభ్యర్థుల విజయాన్ని సులభతరం చేయడంతో పాటు, వారిలో గెలుపు ఉత్సాహాన్ని రెట్టింపు చేసేందుకు స్థానిక ఎమ్మెల్యే కొణతాల రామకృష్ణ కీలక ప్రకటన చేశారు. ఎన్నికల్లో అత్యధిక మెజారిటీ సాధించిన వార్డుకు ప్రభుత్వం కేటాయించే సాధారణ నిధులకు అదనంగా రూ. 2 కోట్ల ప్రత్యేక అభివృద్ధి నిధులు మంజూరు చేస్తామని ఆయన హామీ ఇచ్చారు. అభివృద్ధిలో ఆరోగ్యకరమైన పోటీ తత్వం రావాలి అనకాపల్లి పరిధిలోని ఆరు వార్డుల్లో టీడీపీ - జనసేన - బీజేపీ కూటమి అభ్యర్థుల తరఫున ప్రచారంలో పాల్గొన్న ఎమ్మెల్యే కొణతాల మాట్లాడారు. కేవలం విజయం సాధించడమే కాకుండా, ప్రజల మద్దతుతో భారీ ఆధిక్యం సాధించేందుకు అభ్యర్థులు శ్రమించాలని పిలుపునిచ్చారు. "వార్డుల మధ్య అభివృద్ధి పరంగా పోటీ ఉండాలన్నదే నా ఆకాంక్ష. ప్రజల సమస్యలను పరిష్కరిస్తూ, ఏ వార్డు అభ్యర్థి అయితే అత్యధిక మెజారిటీతో విజయం సాధిస్తారో, ఆ వార్డును మోడల్ వార్డుగా తీర్చిదిద్దేందుకు రూ.2 కోట్ల అదనపు నిధులు కేటాయిస్తాం" అని కొణతాల స్పష్టం చేశారు. వార్డుల్లో ముమ్మరమైన ప్రచారం ఎమ్మెల్యే చేసిన ఈ ఆఫర్‌తో ఆరు వార్డుల్లోని కూటమి శ్రేణుల్లో నూతనోత్సాహం నెలకొంది. రూ.2 కోట్ల ప్రత్యేక నిధిని తమ వార్డుకే దక్కించుకోవాలనే పట్టుదలతో అభ్యర్థులు, నాయకులు ఓటర్లను ప్రసన్నం చేసుకునేందుకు ప్రచారాన్ని మరింత ముమ్మరం చేశారు. ఇంటింటి ప్రచారంతో పాటు స్థానిక సమస్యల పరిష్కారంపై హామీలు గుప్పిస్తున్నారు. ఈ ఆరు వార్డుల్లో ఏ వార్డు ప్రజలు కూటమికి భారీ మెజారిటీ కట్టబెడతారు? రూ.2 కోట్ల అదనపు నిధులను ఏ వార్డు సొంతం చేసుకుంటుంది? అనేది ఎన్నికల ఫలితాల అనంతరం తేలనుంది.

అనకాపల్లి (ప్రజాముద్ర ప్రతినిధి): అర్నబ్ తుఫాను ప్రభావంతో అనకాపల్లి జిల్లావ్యాప్తంగా ఈదురుగాలులతో కూడిన భారీ వర్షం కురిసింది. తుఫాను తీవ్రతకు పలు మండలాల్లో భారీ వృక్షాలు, విద్యుత్ స్తంభాలు నేలకొరిగాయి. అధికార యంత్రాంగం బుధవారం ఉదయం 5 గంటల వరకు విడుదల చేసిన నష్టాల నివేదిక ప్రకారం, జిల్లాలో భారీ వర్షపాతం నమోదైనప్పటికీ ప్రాణ, పశు నష్టం తప్పడంతో ప్రజలు, అధికారులు ఊపిరి పీల్చుకున్నారు. ​74 భారీ వృక్షాలు నేలమట్టం తుఫాను ధాటికి జిల్లాలోని పలు ప్రధాన రహదారులు, గ్రామీణ మార్గాల్లో మొత్తం 74 చెట్లు కూలి రాకపోకలకు అంతరాయం కలిగింది. సమాచారం అందుకున్న వెంటనే రెవెన్యూ, ఆర్ అండ్ బి, పంచాయతీ, అగ్నిమాపక శాఖల సిబ్బంది రంగంలోకి దిగారు. ఇప్పటివరకు 67 చెట్లను తొలగించి రాకపోకలను పునరుద్ధరించగా, మిగిలిన 7 చెట్లను తొలగించే పనులు వేగంగా సాగుతున్నాయి. అత్యధికంగా మునగపాక మండలంలో 16, ఎలమంచిలిలో 14, అచ్యుతాపురంలో 9, సబ్బవరంలో 7, కోటవురట్లలో 6 చెట్లు కూలిపోయాయి. ​దెబ్బతిన్న 42 విద్యుత్ స్తంభాలు.. 3 ఇళ్లకు పాక్షిక నష్టం తుఫాను ఈదురుగాలుల ధాటికి జిల్లావ్యాప్తంగా మొత్తం 42 విద్యుత్ స్తంభాలు విరిగిపడ్డాయి. వీటిలో ఏపీఈపీడీసీఎల్ సిబ్బంది యుద్ధప్రాతిపదికన స్పందించి 20 స్తంభాలను పునరుద్ధరించారు. మిగిలిన 22 స్తంభాలను సరిచేసి విద్యుత్ సరఫరాను పునరుద్ధరించేందుకు ప్రయత్నాలు ముమ్మరం చేశారు. బుచ్చయ్యపేటలో 10, పరవాడలో 9, కశింకోటలో 4, ఎలమంచిలిలో 4 స్తంభాలు దెబ్బతిన్నాయి. కాగా, మునగపాకలో రెండు, రాంబిల్లిలో ఒక ఇల్లు దెబ్బతిన్నట్లు అధికారికంగా నమోదైంది. ​కశింకోటలో అత్యధిక వర్షపాతం.. 85 పునరావాస కేంద్రాల పరిశీలన జిల్లావ్యాప్తంగా మొత్తం 4,593.2 మిల్లీమీటర్ల వర్షపాతం నమోదైంది. అత్యధికంగా కశింకోట మండలంలో 266.8 మి.మీ, మునగపాకలో 256.2 మి.మీ, పరవాడలో 244.2 మి.మీ, ఎలమంచిలిలో 235.8 మి.మీ వర్షపాతం రికార్డయింది. ముందస్తు జాగ్రత్త చర్యగా అధికారులు జిల్లాలోని 85 తుఫాను సహాయక, పునరావాస కేంద్రాలను నిరంతరం సందర్శిస్తూ సహాయక చర్యలను పర్యవేక్షిస్తున్నారు. ప్రజలు అప్రమత్తంగా ఉండాలని, అత్యవసరమైతే తప్ప బయటకు రావద్దని అధికారులు విజ్ఞప్తి చేశారు.

అనకాపల్లి (అక్టోబర్ 28, బుధవారం): 'అర్నబ్' తుపాను హెచ్చరికల నేపథ్యంలో అనకాపల్లి పట్టణంలోని ఫ్లైఓవర్, రైల్వే అండర్ బ్రిడ్జ్ (RUB) పనులను జిల్లా కలెక్టర్ విజయ కృష్ణన్, జాయింట్ కలెక్టర్ సౌర్యమాన్ పటేల్‌తో కలిసి బుధవారం ఉదయం క్షేత్రస్థాయిలో పరిశీలించారు. ​ఈ సందర్భంగా జిల్లా కలెక్టర్ మాట్లాడుతూ... తుపాను ప్రభావంతో కురిసే భారీ వర్షాల వల్ల అండర్ బ్రిడ్జ్ వద్ద వర్షపు నీరు నిలవకుండా ముందస్తు చర్యలు చేపట్టాలని ఆదేశించారు. నీటిని ఎప్పటికప్పుడు తోడివేసేందుకు భారీ సామర్థ్యం కలిగిన డ్రైనేజీ పంపులు, మోటార్లను అందుబాటులో ఉంచాలని, డ్రైనేజీ కాలువల పూడికతీత పనులను అధికారులు నిరంతరం పర్యవేక్షించాలని స్పష్టం చేశారు. ​అలాగే రహదారులు, డ్రైనేజీ నిర్మాణ పనుల్లో ఎటువంటి నాణ్యతా లోపాలు ఉండకూడదని ఆర్‌ అండ్ బి, రైల్వే, మున్సిపల్ అధికారులను హెచ్చరించారు. పనుల వల్ల ప్రజలకు ఎటువంటి రాకపోకల ఇబ్బందులు తలెత్తకుండా ప్రత్యామ్నాయ మార్గాలను సిద్ధం చేయాలని, ట్రాఫిక్ నియంత్రణపై ప్రత్యేక దృష్టి సారించాలని పోలీసు శాఖకు సూచించారు. ​ఈ తనిఖీ కార్యక్రమంలో జిల్లా కలెక్టర్, జాయింట్ కలెక్టర్‌లతో పాటు రైల్వే ఇంజనీరింగ్ విభాగం అధికారులు, ఆర్‌ అండ్ బి ఈఈ, మున్సిపల్ కమిషనర్ తదితర సంబంధిత శాఖల అధికారులు పాల్గొన్నారు.

అనకాపల్లి క్రైమ్ బ్యూరో: అర్ణబ్ తుపాను ప్రభావంతో అనకాపల్లి జిల్లా వ్యాప్తంగా ఈదురు గాలులతో కూడిన భారీ వర్షం కురుస్తోంది. తీవ్ర గాలుల ధాటికి మంగళవారం రాత్రి అనకాపల్లి పరిసర ప్రాంతాల్లోని జాతీయ రహదారిపై పలుచోట్ల భారీ వృక్షాలు నేలకూలి రాకపోకలకు తీవ్ర అంతరాయం ఏర్పడింది. సమాచారం అందిన వెంటనే అధికార యంత్రాంగం, పోలీసు సిబ్బంది హుటాహుటిన ఘటనా స్థలాలకు చేరుకుని యుద్ధప్రాతిపదికన సహాయక చర్యలు చేపట్టి ట్రాఫిక్‌ను క్రమబద్ధీకరించారు. ​డైట్ కాలేజీ వద్ద 20 నిమిషాల్లోనే క్లియరెన్స్ ​అనకాపల్లి నేషనల్ హైవేపై డైట్ (DIET) ఇంజనీరింగ్ కాలేజీ సమీపంలో భారీ వృక్షం కూలిపోవడంతో వాహనాలు ఎక్కడికక్కడ నిలిచిపోయాయి. ఈ సమాచారం తెలిసిన వెంటనే జోనల్ కమిషనర్ శ్రీ చక్రవర్తి, ఎంఆర్వో శ్రీ ఆనందరావు, అనకాపల్లి ట్రాఫిక్ సీఐ శ్రీ నాగేశ్వరరావు, టౌన్ సీఐ శ్రీ ప్రేమ్ కుమార్ తమ సిబ్బందితో ఘటనా స్థలానికి చేరుకున్నారు. వివిధ శాఖల సమన్వయంతో అధికారులు రంగంలోకి దిగి కేవలం 20 నిమిషాల వ్యవధిలోనే రోడ్డుకు అడ్డంగా పడిన భారీ చెట్టును తొలగించారు. అనంతరం వాహనాల రాకపోకలను పునరుద్ధరించి ప్రయాణికులకు ఎలాంటి ఇబ్బందులు లేకుండా చర్యలు తీసుకున్నారు. ​కొప్పాక, ఆర్టీవో ఆఫీస్ వద్ద రాత్రి వేళ సహాయక చర్యలు ​మరోవైపు అనకాపల్లి రూరల్ పోలీస్ స్టేషన్ పరిధిలోని కొప్పాక, ఆర్టీవో ఆఫీస్ సమీపంలో జాతీయ రహదారిపై మరో రెండు పెద్ద చెట్లు కూలిపోయాయి. చీకటి, ఎడతెరిపిలేని భారీ వర్షం, భీకర గాలులను సైతం లెక్కచేయకుండా అనకాపల్లి రూరల్ సీఐ శ్రీ జి. అశోక్ కుమార్, ఎస్ఐ శ్రీ జి. రవి కుమార్ తమ సిబ్బందితో సంఘటనా స్థలానికి చేరుకున్నారు. జీవీఎంసీ (GVMC) సిబ్బంది సహకారంతో హైవేపై పడిన చెట్ల కొమ్మలను నరికివేసి రహదారిని క్లియర్ చేశారు. ​తీవ్ర ప్రతికూల వాతావరణంలోనూ సమయస్ఫూర్తితో స్పందించి, గంటల తరబడి ట్రాఫిక్ జామ్ కాకుండా చర్యలు చేపట్టిన పోలీసు, రెవెన్యూ, మున్సిపల్ అధికారుల పనితీరుపై స్థానిక ప్రజలు, వాహనదారులు ప్రశంసలు కురిపించారు.

అనకాపల్లి:బంగాళాఖాతంలో ఏర్పడిన ‘ఆర్నాబ్’ తుపాను ప్రభావంతో జిల్లా వ్యాప్తంగా ఎడతెరిపి లేకుండా కురుస్తున్న భారీ వర్షాల కారణంగా పెద్దేరు రిజర్వాయర్‌కు వరద పోటెత్తుతోంది. ఎగువ పరీవాహక ప్రాంతాల నుంచి భారీగా వరద నీరు వచ్చి చేరుతుండటంతో ప్రాజెక్టు నీటిమట్టం ప్రమాద స్థాయికి చేరింది. దీంతో ప్రాజెక్టు భద్రతను దృష్టిలో ఉంచుకుని ఇరిగేషన్ అధికారులు రిజర్వాయర్ గేట్లు ఎత్తి నీటిని దిగువకు విడుదల చేస్తున్నారు.ఈ నేపథ్యంలో నదీ పరివాహక ప్రాంతాలు, లోతట్టు గ్రామాల ప్రజలు తీవ్ర అప్రమత్తంగా ఉండాలని జిల్లా కలెక్టర్ విజయకృష్ణన్ ఒక అత్యవసర ప్రకటనలో హెచ్చరించారు. వరద ఉధృతి నేపథ్యంలో ఎలాంటి ప్రాణ, ఆస్తి నష్టం జరగకుండా రెవెన్యూ, పోలీస్, ఇరిగేషన్ శాఖల అధికారులు సమన్వయంతో క్షేత్రస్థాయిలో చర్యలు చేపట్టాలని ఆదేశించారు. ​ముంపు ముప్పు పొంచి ఉన్న మండలాలు – గ్రామాలు: ​మాడుగుల మండలం: పోతనపూడి, వీ.వీ. అగ్రహారం ​అనకాపల్లి మండలం: తగరంపూడి, వెంకుపాలెం, సీతానగరం, తుంపాల, సత్యనారాయణపురం, కొత్తూరు ​బుచ్చయ్యపేట మండలం: వడ్డాది, విజయరామరాజుపేట పరిసర ప్రాంతాలు ​చోడవరం మండలం: గౌరీపట్నం, జన్నవరం, బెన్నవోలు, పి.ఎస్. పేట ​కశింకోట మండలం: కశింకోట, తేగాడ, పెరంటాలపాలెం, జోగారావుపేట ​రాంబిల్లి మండలం: కొత్తూరు, రజాల గ్రామాలు ​ప్రజలకు జిల్లా యంత్రాంగం ముఖ్య సూచనలు: ​నదులు, వాగుల వైపు వెళ్లొద్దు: కాలువలు, కాజ్‌వేలు, నదీ తీరాల వద్దకు ఎట్టి పరిస్థితుల్లోనూ వెళ్లవద్దు. వరద ఉధృతిని చూసేందుకు వంతెనలపై గుమిగూడటం నిషేధం. ​పశువుల రక్షణ బాధ్యత: పశువులు, గొర్రెలు, మేకలను నదీ ప్రవాహ ప్రాంతాలకు మేత కోసం తోలకూడదు. వాటిని ముందుగానే ఎత్తైన సురక్షిత ప్రాంతాలకు తరలించాలి. ​అధికారుల ఆదేశాలు పాటించండి: లోతట్టు ప్రాంతాల్లోని ప్రజలు ముందస్తు జాగ్రత్తగా అధికారులు ఏర్పాటు చేసిన పునరావాస కేంద్రాలకు తరలివెళ్లాలి. ​అత్యవసర సమాచారం: పుకార్లను నమ్మవద్దు. అత్యవసర సహాయం కోసం గ్రామ/వార్డు సచివాలయ సిబ్బందిని లేదా సమీప పోలీస్ స్టేషన్, కలెక్టరేట్ కంట్రోల్ రూమ్‌ను సంప్రదించాలి.

​బంగాళాఖాతంలో ఏర్పడిన ‘అర్నాబ్’ తుఫాన్ ప్రభావంతో అనకాపల్లి జిల్లాలో గంటకు 80 కిలోమీటర్లకు పైగా వేగంతో బలమైన ఈదురుగాలులు, భారీ వర్షాలు కురిసే అవకాశం ఉందని జిల్లా యంత్రాంగం ప్రకటించింది. ఈ నేపథ్యంలో జిల్లా కలెక్టర్ విజయ కృష్ణన్ మరియు విద్యుత్ శాఖ పర్యవేక్షక ఇంజనీర్ జి. ప్రసాద్ ప్రజలకు, రైతులకు మరియు సిబ్బందికి పలు అత్యవసర ఆదేశాలు, సూచనలు జారీ చేశారు. ​1. పాఠశాలలు & అంగన్‌వాడీలకు 3 రోజులు సెలవులు ​విద్యార్థులు, ఉపాధ్యాయుల భద్రతను దృష్టిలో ఉంచుకుని అక్టోబర్ 27 నుంచి 29 వరకు (మూడు రోజులు) జిల్లాలోని అన్ని ప్రభుత్వ, ప్రైవేటు పాఠశాలలు మరియు అంగన్‌వాడీ కేంద్రాలకు సెలవులు ప్రకటించారు. ​2. విద్యుత్ శాఖ కంట్రోల్ రూమ్ & హెల్ప్‌లైన్ నంబర్లు ​అనకాపల్లి జిల్లా విద్యుత్ శాఖ కార్యాలయంలో 24 గంటల పాటు (3 షిఫ్టులలో) పనిచేసే కంట్రోల్ రూమ్ ఏర్పాటయింది. ​24x7 సర్కిల్ కంట్రోల్ రూమ్: 8712410720 (LMC అనకాపల్లి) ​విద్యుత్ టోల్ ఫ్రీ నంబర్: 1912 ​డివిజన్ల వారీగా వాట్సాప్ ఫిర్యాదు నంబర్లు: ​అనకాపల్లి డివిజన్: 9063110544 ​కశింకోట డివిజన్: 8333810597 ​నర్సీపట్నం డివిజన్: 9491030714 ​3. ముందస్తు రక్షణ చర్యలు & వైద్య ఏర్పాట్లు ​తీరప్రాంతాలు: పరవాడ నుంచి పాయకరావుపేట వరకు ఉన్న 6 తీర మండలాల్లోని మత్స్యకార గ్రామాలు, గిరిజన సబ్ ప్లాన్ గ్రామాలు మరియు వరద ముప్పు ఉన్న ప్రాంతాలను గుర్తించి అధికారులు అప్రమత్తం చేశారు. ​మత్స్యకారులకు ఆదేశాలు: మత్స్యకారులు సముద్రంలోకి వేటకు వెళ్లరాదు. బోట్లను తీరానికి దూరంగా సురక్షిత ప్రదేశాల్లో ఉంచాలి; తుఫాన్ సమయంలో బోట్లను చూసేందుకు వెళ్లకూడదు. ​గర్భిణీ స్త్రీల సంరక్షణ: రాబోయే వారం రోజుల్లో ప్రసవమయ్యే అవకాశం ఉన్న గర్భిణులను గుర్తించి సమీపంలోని PHC, CHC, ఏరియా లేదా జిల్లా ఆసుపత్రులకు ముందస్తుగానే తరలిస్తున్నారు. ​పునరావాస కేంద్రాలు: కచ్చా ఇళ్లలో ఉన్నవారు, లోతట్టు ప్రాంతాల ప్రజలు వెంటనే ప్రభుత్వం ఏర్పాటు చేసిన రిలీఫ్ కేంద్రాలకు చేరుకోవాలి. ​4. ప్రజలు పాటించాల్సిన కీలక జాగ్రత్తలు ​విద్యుత్ సరఫరాలో అంతరాయం ఏర్పడే అవకాశం ఉన్నందున ముందుగానే వాటర్ ట్యాంకులను నింపి ఉంచుకోవాలి. ​వర్షం వల్ల తెగిపడిన విద్యుత్ తీగలు, తడిసిన స్తంభాలు, తీగలపై పడిన కొమ్మలను ముట్టుకోరాదు. ​సురక్షితమైన తాగునీటి కోసం కాచి చల్లార్చిన నీటిని తాగాలి, వేడి ఆహారాన్ని మాత్రమే తీసుకోవాలి. ​ఈదురుగాలులు వీచే సమయంలో చెట్లు, హోర్డింగ్‌ల కింద నిలబడవద్దు. ​5. రైతులకు సూచనలు ​అరటి, కొబ్బరి, తమలపాకు, పోక (అరేకానట్) వంటి పంటలకు చెట్లు పడిపోకుండా తాత్కాలిక ఊతాలు (సపోర్ట్) ఏర్పాటు చేసుకోవాలి. ​కోత దశకు వచ్చిన పంటల హార్వెస్టింగ్‌ను వెంటనే పూర్తి చేయాలి. ఎక్కడైనా నీరు నిలిచిపోతే స్థానిక రైతు సేవా కేంద్రాల (RSK) సిబ్బందిని సంప్రదించాలి.

అనకాపల్లి:(ప్రజాముద్ర ప్రతినిధి) రోడ్డు ప్రమాదాల నివారణే లక్ష్యంగా అనకాపల్లి ట్రాఫిక్ పోలీస్ స్టేషన్ పరిధిలోని పూడిమడక జంక్షన్ వద్ద వాహనదారులు, ప్రయాణికులకు ట్రాఫిక్ నియమాలు, రహదారి భద్రతపై విస్తృత అవగాహన కార్యక్రమం నిర్వహించారు. అనకాపల్లి జిల్లా ఎస్పీ శ్రీ తుహిన్ సిన్హా, ఐపీఎస్ మరియు అనకాపల్లి ఎస్డీపీవోల ఆదేశాల మేరకు ట్రాఫిక్ సీఐ శ్రీ కె. నాగేశ్వరరావు ఆధ్వర్యంలో ఈ కార్యక్రమం జరిగింది. ఈ సందర్భంగా సీఐ నాగేశ్వరరావు మాట్లాడుతూ ప్రతి ఒక్కరూ బాధ్యతాయుతంగా ట్రాఫిక్ నియమాలు పాటించాలని కోరారు. ముఖ్యంగా: హెల్మెట్ తప్పనిసరి: ద్విచక్ర వాహనదారులు తప్పనిసరిగా హెల్మెట్ ధరించాలి. మద్యం తాగి డ్రైవింగ్ వద్దు: మద్యం సేవించి వాహనాలు నడపడం చట్టరీత్యా నేరమని, దీనివల్ల ప్రాణాలకే ముప్పు వాటిల్లుతుందని హెచ్చరించారు. ట్రిపుల్ రైడింగ్, అతివేగం నిషేధం: అతివేగం, అజాగ్రత్త మరియు ట్రిపుల్ రైడింగ్ ప్రమాదాలకు ప్రధాన కారణాలని స్పష్టం చేశారు. మైనర్లకు వాహనాలు ఇవ్వరాదు: మైనర్ బాలబాలికలకు ఎట్టి పరిస్థితుల్లోనూ వాహనాలు ఇవ్వకూడదని తల్లిదండ్రులకు సూచించారు. సిగ్నల్ నియమాలు: ట్రాఫిక్ సిగ్నల్స్‌ను ఖచ్చితంగా పాటించాలి. ప్రయాణికులకు సూచనలు: ఆటోలు, బస్సులు ఎక్కేటప్పుడు, దిగేటప్పుడు అప్రమత్తంగా ఉండాలని, నిర్లక్ష్యం తగదని ప్రయాణికులకు హితవు పలికారు. ప్రతి ఒక్కరూ బాధ్యతాయుతంగా వ్యవహరించడం ద్వారా ప్రమాదాలను అరికట్టవచ్చని, మన ప్రాణాలతో పాటు తోటి ప్రయాణికుల ప్రాణాలను కాపాడిన వారవుతామని పోలీసులు స్పష్టం చేశారు. ఈ కార్యక్రమంలో ట్రాఫిక్ పోలీస్ సిబ్బంది, స్థానిక వాహనదారులు, ప్రయాణికులు పాల్గొన్నారు

​అనకాపల్లి: అనకాపల్లి జిల్లా కలెక్టర్ విజయ కృష్ణన్ పేరుతో గుర్తుతెలియని వ్యక్తులు నకిలీ వాట్సాప్ సందేశాలతో అసత్య ప్రచారం చేస్తున్నారని, ఇటువంటి తప్పుడు వార్తలను ఎవరూ నమ్మవద్దని అధికార యంత్రాంగం స్పష్టం చేసింది. ​గత రెండు రోజులుగా కలెక్టర్ పేరు, నకిలీ ఫోన్ నంబర్లను ఉపయోగించి వాట్సాప్‌లో పలు తప్పుడు సందేశాలు, సమాచారాన్ని వ్యాప్తి చేస్తున్నట్లు అధికారుల దృష్టికి వచ్చింది. ఈ నేపథ్యంలో జిల్లా ప్రజలతో పాటు వివిధ శాఖల ప్రభుత్వ అధికారులు కూడా అప్రమత్తంగా ఉండాలని సూచించారు. గుర్తుతెలియని నంబర్ల నుంచి వచ్చే సందేశాలను పరిశీలించకుండా నమ్మవద్దని, ఇతరులకు ఫార్వర్డ్ చేయవద్దని స్పష్టం చేశారు. నకిలీ సందేశాలు సృష్టించే వారిపై, వాటిని ఉద్దేశపూర్వకంగా ప్రచారం చేసే వారిపై చట్టపరమైన కఠిన చర్యలు తీసుకుంటామని అధికారులు హెచ్చరించారు. అనుమానాస్పద సందేశాలు వస్తే వెంటనే సంబంధిత అధికారుల దృష్టికి తీసుకురావాలని కోరారు

అనకాపల్లి:గ్రేటర్ విశాఖపట్నం నగరపాలక సంస్థ (జీవీఎంసీ) పరిధిలోని అనకాపల్లి జోన్‌కు చెందిన 107 నుండి 112 వార్డుల వార్డు మెంబర్ స్థానాలకు సంబంధించి ఎన్నికల ప్రక్రియ తుది ఘట్టానికి చేరుకుంది. నామినేషన్ల ఉపసంహరణ గడువు ముగియడంతో ఎన్నికల అధికారులు అధికారికంగా తుది పోటీదారుల జాబితాను (ఫారం-XI) ప్రకటించారు. మొత్తం 6 వార్డులలో కలిపి 14 మంది అభ్యర్థులు తమ నామినేషన్లను ఉపసంహరించుకోగా, చివరకు 19 మంది అభ్యర్థులు ఎన్నికల బరిలో నిలిచారు. ఈ 6 వార్డులకు సంబంధించి ఈ నెల 28న ఉదయం 7:00 గంటల నుండి సాయంత్రం 5:00 గంటల వరకు పోలింగ్ జరగనుంది. ​వార్డుల వారీగా సమగ్ర వివరాలు: ​107వ వార్డు (రిజర్వేషన్: బీసీ మహిళ) ​ఈ వార్డులో మొత్తం ముగ్గురు అభ్యర్థులు నామినేషన్లను ఉపసంహరించుకోవడంతో ప్రధాన పార్టీలైన వైఎస్సార్‌సీపీ, టీడీపీ మధ్య ద్విముఖ పోటీ నెలకొంది. ​వెంకట లక్ష్మి పన్నీరు (వైఎస్సార్‌సీపీ): ​విద్యార్హత: ఎస్సెస్సీ (SSC) | వయస్సు: 44 ఏళ్లు | వృత్తి: గృహిణి ​చిరునామా: డోర్ నెం: 3-2-134, పాఠశాల దగ్గర, సిరసపల్లి గ్రామం, అనకాపల్లి మండలం ​గుర్తు: పంఖా (సీలింగ్ ఫ్యాన్) ​చినతల్లి మాదంశెట్టి (టీడీపీ): ​విద్యార్హత: నిరక్షరాస్యురాలు | వయస్సు: 61 ఏళ్లు | వృత్తి: వ్యాపారం ​చిరునామా: డోర్ నెం: 1-56, చినతాడి గ్రామం, పరవాడ మండలం ​గుర్తు: సైకిల్ ​ఉపసంహరించుకున్న వారు: బల్లినా లక్ష్మీబాయి (స్వతంత్ర), శిరంశెట్టి రేణుక (స్వతంత్ర), పన్నీరు వరలక్ష్మి (స్వతంత్ర). ​108వ వార్డు (రిజర్వేషన్: బీసీ మహిళ) ​ఈ వార్డులో ప్రధాన పార్టీలతో పాటు ఒక స్వతంత్ర అభ్యర్థి బరిలో ఉండటంతో త్రిముఖ పోరు ఏర్పడింది. ​సిందూజ కొణతాల (టీడీపీ): ​విద్యార్హత: బి.ఎ. (B.A.) | వయస్సు: 40 ఏళ్లు | వృత్తి: గృహిణి ​చిరునామా: డోర్ నెం: 14-16-7, నిధానందొడ్డి, గవరపాలెం, అనకాపల్లి ​గుర్తు: సైకిల్ ​సరోజిని బొడ్డేడ (వైఎస్సార్‌సీపీ): ​విద్యార్హత: ఇంటర్మీడియట్ | వయస్సు: 47 ఏళ్లు | వృత్తి: వ్యాపారం ​చిరునామా: డోర్ నెం: 12-16-41, భోగలింగేశ్వర స్వామి గుడి వీధి, అగ్గిమర్రిచెట్టు దగ్గర, గవరపాలెం, అనకాపల్లి ​గుర్తు: పంఖా (సీలింగ్ ఫ్యాన్) ​తులసి పెంటకోట (స్వతంత్ర అభ్యర్థి): ​విద్యార్హత: బి.ఎ. (B.A.) | వయస్సు: 33 ఏళ్లు | వృత్తి: గృహిణి ​చిరునామా: డోర్ నెం: 15-16-62, పి.వి.ఆర్. నాయుడు వీధి, గవరపాలెం, అనకాపల్లి ​గుర్తు: ఎయిర్ కండీషనర్ ​ఉపసంహరించుకున్న వారు: మళ్ళ కృష్ణకుమారి (బీజేపీ). ​109వ వార్డు (రిజర్వేషన్: బీసీ మహిళ) ​ఇక్కడ వైఎస్సార్‌సీపీ, కాంగ్రెస్, జనసేన అభ్యర్థుల మధ్య తీవ్ర పోటీ నెలకొంది. ​లలిత కర్రి (వైఎస్సార్‌సీపీ): ​విద్యార్హత: ఎస్సెస్సీ (SSC) | వయస్సు: 41 ఏళ్లు | వృత్తి: గృహిణి ​చిరునామా: డోర్ నెం: 18-1-14, నెయ్యల వీధి, గవరపాలెం, అనకాపల్లి ​గుర్తు: పంఖా (సీలింగ్ ఫ్యాన్) ​కోరిబిల్లి నూక భారతి (భారత జాతీయ కాంగ్రెస్): ​విద్యార్హత: ఇంటర్మీడియట్ | వయస్సు: 36 ఏళ్లు | వృత్తి: గృహిణి ​చిరునామా: డోర్ నెం: 17-5-69, సంత బయలు, గవరపాలెం, అనకాపల్లి ​గుర్తు: హస్తం ​జ్యోతి బుద్ధ (జనసేన పార్టీ): ​విద్యార్హత: ఇంటర్మీడియట్ | వయస్సు: 30 ఏళ్లు | వృత్తి: గృహిణి ​చిరునామా: డోర్ నెం: 20-1-61, దేముడుతోట వీధి, గవరపాలెం, అనకాపల్లి ​గుర్తు: గాజు గ్లాస్ ​ఉపసంహరించుకున్న వారు: బొడ్డేడ వరలక్ష్మి (స్వతంత్ర), కర్రి పూజిత (స్వతంత్ర). ​110వ వార్డు (రిజర్వేషన్: మహిళ - జనరల్) ​ఈ వార్డులో చతుర్ముఖ పోటీ నెలకొంది. ​జోష్ణ పద్మజ ఉగ్గిన (వైఎస్సార్‌సీపీ): ​విద్యార్హత: ఎస్సెస్సీ (SSC) | వయస్సు: 30 ఏళ్లు | వృత్తి: గృహిణి ​చిరునామా: డోర్ నెం: 6-5-32, వేల్పుల వీధి, కాశీ విశ్వేశ్వర స్వామి ఆలయం దగ్గర, అనకాపల్లి ​గుర్తు: పంఖా ​గౌరిపట్నపు దేవి (భారత జాతీయ కాంగ్రెస్): ​కులం: బీసీ-బి (విశ్వబ్రాహ్మణ) | విద్యార్హత: ఎస్సెస్సీ (SSC) | వయస్సు: 40 ఏళ్లు | వృత్తి: గృహిణి ​చిరునామా: డోర్ నెం: 1-11-14, అంజయ్య కాలనీ, గాంధీనగర్, అనకాపల్లి ​గుర్తు: హస్తం ​తాడి శాంతి కుమారి (జనసేన పార్టీ): ​కులం: బీసీ-డి (తూర్పు కాపు) | విద్యార్హత: ఎంబీఏ (MBA) | వయస్సు: 38 ఏళ్లు | వృత్తి: గృహిణి ​చిరునామా: డోర్ నెం: 12-5-78, బారు వారి వీధి, అనకాపల్లి ​గుర్తు: గాజు గ్లాస్ ​దుర్గాదేవి పర్రి (బహుజన్ సమాజ్ పార్టీ - బీఎస్పీ): ​విద్యార్హత: ఎస్సెస్సీ (SSC) | వయస్సు: 32 ఏళ్లు | వృత్తి: వ్యాపారం ​చిరునామా: డోర్ నెం: 2-30-33, విజయరామరాజుపేట, అనకాపల్లి ​గుర్తు: ఏనుగు ​ఉపసంహరించుకున్న వారు: సుబ్బలక్ష్మి టెంకాల (వైఎస్సార్‌సీపీ), తాకాశి సూర్య పద్మ (వైఎస్సార్‌సీపీ), వీసం కనకమహాలక్ష్మి (బీజేపీ). ​111వ వార్డు (రిజర్వేషన్: బీసీ మహిళ) ​ఈ వార్డులో అత్యధికంగా 5 గురు అభ్యర్థులు బరిలో నిలిచారు. ​పలకా యశోద (భారతీయ జనతా పార్టీ - బీజేపీ): ​విద్యార్హత: డిగ్రీ (Degree) | వయస్సు: 37 ఏళ్లు | వృత్తి: వ్యాపారం ​చిరునామా: డోర్ నెం: 2-7-1, విజయరామరాజుపేట, అనకాపల్లి ​గుర్తు: కమలం ​శీలం నదియ @ దళాయి నదియ (వైఎస్సార్‌సీపీ): ​విద్యార్హత: ఇంటర్మీడియట్ | వయస్సు: 32 ఏళ్లు | వృత్తి: గృహిణి ​చిరునామా: డోర్ నెం: 9-7-8/1, కొణతాల వీధి, అనకాపల్లి ​గుర్తు: పంఖా ​కోలపర్తి అరుణ కుమారి (స్వతంత్ర అభ్యర్థి): ​విద్యార్హత: పి.యు.సి. (PUC) | వయస్సు: 50 ఏళ్లు | వృత్తి: గృహిణి ​చిరునామా: డోర్ నెం: 13-2-31, మసీదు వీధి, అనకాపల్లి ​గుర్తు: బీరువా ​దేవి బోనాల (స్వతంత్ర అభ్యర్థి): ​విద్యార్హత: ఎస్సెస్సీ (SSC) | వయస్సు: 47 ఏళ్లు | వృత్తి: గృహిణి ​చిరునామా: డోర్ నెం: 7-11-32, లోక వారి వీధి, అనకాపల్లి ​గుర్తు: కొబ్బరికాయ ​జ్యోతి శానాపతి @ జ్యోతి సేనాపతి (స్వతంత్ర అభ్యర్థి): ​విద్యార్హత: ఎస్సెస్సీ (SSC) | వయస్సు: 27 ఏళ్లు | వృత్తి: గృహిణి ​చిరునామా: డోర్ నెం: 9-3-22, కొట్ని వీధి, రామాలయం దగ్గర, అనకాపల్లి ​గుర్తు: ఎయిర్ కండీషనర్ ​ఉపసంహరించుకున్న వారు: శ్రీకాకుళపు వరాహ వెంకటలక్ష్మి (వైఎస్సార్‌సీపీ), గేదేల దేవి సూర్యమణి దీపిక (బీజేపీ), కాతా వెంకటలక్ష్మి (టీడీపీ), మజ్జి మంజుల (టీడీపీ). ​112వ వార్డు (రిజర్వేషన్: మహిళ - జనరల్) ​ఈ వార్డులో ఉన్నత విద్యావంతులైన ముగ్గురు మహిళల మధ్య పోటీ ఆసక్తికరంగా మారింది. ​వైష్ణవి అల్ల @ వైష్ణవి ఆళ్ళ (జనసేన పార్టీ): ​కులం: బీసీ-డి (గవర) | విద్యార్హత: ఫార్మా-డి (Pharma-D) | వయస్సు: 28 ఏళ్లు | వృత్తి: గృహిణి ​చిరునామా: డోర్ నెం: 12-165, గుండాల వీధి, BC బాలికల హాస్టల్ పక్కన, సాయి నగర్, అనకాపల్లి ​గుర్తు: గాజు గ్లాస్ ​ప్రసన్న లక్ష్మి జాజుల (వైఎస్సార్‌సీపీ): ​కులం: బీసీ-డి (తూర్పు కాపు) | విద్యార్హత: బి.ఎడ్. (B.Ed) | వయస్సు: 31 ఏళ్లు | వృత్తి: గృహిణి ​చిరునామా: డోర్ నెం: 4-9-16, మిర్యాల కాలనీ, అనకాపల్లి ​గుర్తు: పంఖా ​తుట్ట ప్రియాంక (భారత జాతీయ కాంగ్రెస్): ​కులం: బీసీ-ఎ (యాత) | విద్యార్హత: బి.ఎ. ఎల్‌ఎల్‌బీ (BA LLB) | వయస్సు: 25 ఏళ్లు | వృత్తి: హైకోర్టు న్యాయవాది ​చిరునామా: డోర్ నెం: 4-7-34/A, మిర్యాల కాలనీ, అనకాపల్లి ​గుర్తు: హస్తం ​ఉపసంహరించుకున్న వారు: జాజుల ధనలక్ష్మి (వైఎస్సార్‌సీపీ). ​నామినేషన్ల ఉపసంహరణ ముగిసి గుర్తులు కేటాయించడంతో అన్ని వార్డుల్లో ప్రచారం ముమ్మరమైంది. పోలింగ్ కేంద్రాలు మరియు ఏర్పాట్లపై ఎన్నికల అధికారులు ప్రత్యేక పర్యవేక్షణ చేపడుతున్నారు.

అనకాపల్లి, అక్టోబర్ 22 (ప్రజాముద్ర ప్రతినిధి): జిల్లాలో జరుగుతున్న ZPTC, MPTC ఎన్నికల నామినేషన్ల ప్రక్రియలో శాంతిభద్రతలకు విఘాతం కలిగిస్తే ఉపేక్షించేది లేదని అనకాపల్లి జిల్లా ఎస్పీ తుహిన్ సిన్హా, ఐపీఎస్ హెచ్చరించారు. నామినేషన్ల ప్రక్రియ రెండో రోజుకు చేరిన నేపథ్యంలో బుధవారం ఆయన బుచ్చయ్యపేట, రావికమతం, రోలుగుంట మండల పరిషత్ కార్యాలయాలు (MPDO), జిల్లా పరిషత్ కార్యాలయ పరిసరాల్లోని నామినేషన్ కేంద్రాలను క్షేత్రస్థాయిలో సందర్శించి భద్రతా ఏర్పాట్లను స్వయంగా సమీక్షించారు. ఈ సందర్భంగా ఎస్పీ మాట్లాడుతూ నామినేషన్ కేంద్రాల వద్ద ఎన్నికల కమిషన్ నిబంధనలను పకడ్బందీగా అమలు చేయాలని అధికారులను ఆదేశించారు. కేంద్రం చుట్టూ ఉన్న 100 మీటర్ల పరిధిని అత్యంత సున్నితమైన ప్రాంతంగా పరిగణించాలని, అక్కడ ప్రజలు గుమిగూడకుండా తక్షణమే చర్యలు తీసుకోవాలని స్పష్టం చేశారు. వేర్వేరు పార్టీల కార్యకర్తల మధ్య ఘర్షణలు తలెత్తకుండా 100 మీటర్ల అవతలే నియంత్రించాలని సూచించారు. అభ్యర్థితో పాటు నలుగురికే అనుమతి నామినేషన్ దాఖలు చేసే సమయంలో కేంద్రం లోపలికి అభ్యర్థితో పాటు గరిష్టంగా నలుగురు వ్యక్తులను మాత్రమే అనుమతిస్తామని ఎస్పీ తెలిపారు. నామినేషన్ పూర్తయిన వెంటనే అభ్యర్థులు, వారి అనుచరులు అక్కడే ఉండకుండా వెంటనే వెనుదిరిగేలా చర్యలు తీసుకోవాలని పోలీసు సిబ్బందికి దిశానిర్దేశం చేశారు. వివిధ రాజకీయ పార్టీలు ఒకే సమయంలో కాకుండా వేర్వేరు వేళల్లో ర్యాలీలు నిర్వహించుకునేలా సమన్వయం చేసుకోవాలని కోరారు. డ్రోన్ నిఘా... అమల్లో సెక్షన్ 163 BNSS ఎన్నికల ప్రక్రియ పారదర్శకంగా, ప్రశాంత వాతావరణంలో జరిగేందుకు అన్ని నామినేషన్ కేంద్రాల పరిసరాల్లో డ్రోన్ల ద్వారా నిరంతర నిఘా ఏర్పాటు చేసినట్లు ఎస్పీ వెల్లడించారు. జిల్లావ్యాప్తంగా సెక్షన్ 30 పోలీస్ యాక్ట్, సెక్షన్ 163 బి.ఎన్.ఎస్.ఎస్. (గతంలో 144 సెక్షన్) అమల్లో ఉన్నాయని, ఎవరైనా చట్టాన్ని అతిక్రమిస్తే కఠిన చర్యలు తప్పవని స్పష్టం చేశారు. ఎన్నికల సజావుగా సాగేందుకు ప్రజలు, అభ్యర్థులు పోలీసులకు పూర్తి సహకారం అందించాలని విజ్ఞప్తి చేశారు. ఈ పర్యటనలో కొత్తకోట సీఐ జి.కోటేశ్వరరావు, ఎస్సైలు మనోజ్ కుమార్, శ్రీనివాస్, రామకృష్ణారావు మరియు ఇతర పోలీసు సిబ్బంది పాల్గొన్నారు.

అనకాపల్లి (ప్రజామద్ర ప్రతినిధి):అనకాపల్లి పట్టణం 108వ వార్డు పరిధిలో కూటమి ఎన్నికల ప్రచారం జోరుగా సాగింది. స్థానిక టీడీపీ కార్పొరేటర్ అభ్యర్థి కొణతాల సింధుజకు మద్దతుగా ఆంధ్రప్రదేశ్ రాష్ట్ర గవర కార్పొరేషన్ చైర్మన్ మళ్ళా సురేంద్ర కూటమి నాయకులతో కలిసి గురువారం విస్తృతంగా ఇంటింటి ప్రచారం నిర్వహించారు. స్థానిక కాలనీల్లో పర్యటిస్తూ ప్రజల సమస్యలను అడిగి తెలుసుకున్నారు. ఈ సందర్భంగా మళ్ళా సురేంద్ర మాట్లాడుతూ... రాష్ట్రంలో కూటమి ప్రభుత్వం అధికారంలోకి వచ్చిన తర్వాత ప్రజా సంక్షేమమే ధ్యేయంగా ముందుకు సాగుతోందని పేర్కొన్నారు. అనేక అభివృద్ధి కార్యక్రమాలతో పాటు సంక్షేమ పథకాలను అర్హులైన ప్రతి ఒక్కరికీ నేరుగా చేరవేస్తున్నామని తెలిపారు. పట్టణ సమగ్ర అభివృద్ధి సాధ్యం కావాలంటే కూటమి ప్రతినిధులను గెలిపించుకోవాలని ఆయన పిలుపునిచ్చారు. సైకిల్ గుర్తుపై ఓటు వేసి కార్పొరేటర్ అభ్యర్థి కొణతాల సింధుజను, అలాగే మేయర్ అభ్యర్థి ముక్కా శ్రావణిని అత్యధిక మెజారిటీతో విజయతీరాలకు చేర్చాలని ఓటర్లను అభ్యర్థించారు. ఈ కార్యక్రమంలో కూటమి ప్రముఖ నాయకులు కొణతాల సంతోష్ అప్పారావు నాయుడు, కొణతాల జగ్గారావు నాయుడు, కాండ్రేగుల జగ్గారావు, పొలిమేర నాయుడు, పెంటకోట శ్రీనివాసరావుతో పాటు పలువురు కూటమి నాయకులు, కార్యకర్తలు పెద్ద సంఖ్యలో పాల్గొన్నారు

అనకాపల్లి, అక్టోబర్ 21:ఎన్నికల నిర్వహణలో అధికారులు అత్యంత అప్రమత్తంగా, బాధ్యతాయుతంగా వ్యవహరించాలని అనకాపల్లి జిల్లా జాయింట్ కలెక్టర్ శౌర్యమాన్ పటేల్ స్పష్టం చేశారు. స్థానిక కలెక్టరేట్ సమావేశ మందిరంలో బుధవారం రిటర్నింగ్, సహాయ రిటర్నింగ్, జిల్లా స్థాయి అధికారులకు నిర్వహించిన శిక్షణ కార్యక్రమంలో ఆయన మాట్లాడారు. జిల్లాలో త్వరలో జరగనున్న జడ్పీటీసీ, ఎంపీటీసీ, పురపాలక, పంచాయతీ ఎన్నికలను పకడ్బందీగా నిర్వహించేందుకు యంత్రాంగం సన్నద్ధం కావాలని ఆదేశించారు. సమస్యాత్మక ప్రాంతాల్లో గత ఘటనలు, కేసుల వివరాలను మండల పరిషత్ అభివృద్ధి అధికారులు, ఎస్హెచ్ఓలు, తహసీల్దార్ల నుంచి సేకరించి కట్టుదిట్టమైన భద్రతా చర్యలు చేపట్టాలని సూచించారు. మార్గ, మండల పటాల ఆధారంగా సున్నిత ప్రాంతాలను నిరంతరం పర్యవేక్షించాలని, ముఖ్యంగా ఎస్సీ, ఎస్టీ కాలనీల ఓటర్లను ఎవరైనా భయభ్రాంతులకు గురిచేసినా, ఓటు హక్కు వినియోగించుకోకుండా అడ్డుకున్నా కఠినంగా వ్యవహరిస్తామని హెచ్చరించారు. ఓటర్లను ప్రలోభాలకు గురిచేయడం లేదా బెదిరించడం భారతీయ న్యాయ సంహిత సెక్షన్ 171 ప్రకారం తీవ్ర నేరమని జిల్లా గ్రామీణాభివృద్ధి సంస్థ పథక సంచాలకురాలు పూర్ణిమ దేవి పేర్కొన్నారు. పోలింగ్ కేంద్రాలను వాటి తీవ్రత ఆధారంగా విభజించి, ఆ వివరాలను నిర్దేశిత ప్రొఫార్మా-1 ద్వారా ముందస్తుగా సమర్పించాలని నిర్దేశించారు. అధికారులు సమన్వయంతో పనిచేస్తూ కేంద్రాల్లో ఓటర్లకు అవసరమైన కనీస సౌకర్యాలు కల్పించాలని, ఎస్ఈసీఎంఎస్ మొబైల్ యాప్ ద్వారా సమాచారాన్ని ఎప్పటికప్పుడు చేరవేయాలని సూచించారు. ఓటర్లు రాని ప్రాంతాలపై ప్రత్యేక నివేదిక అందించాలని ఆదేశించారు. ఈ కార్యక్రమంలో జిల్లా అధికారులతో పాటు గ్రామ రెవెన్యూ అధికారులు, ఇతర సిబ్బంది పాల్గొన్నారు.

అనకాపల్లి, అక్టోబర్ 21:* పోలీసు అమరవీరుల సంస్మరణ దినోత్సవాన్ని పురస్కరించుకుని అనకాపల్లి జిల్లా పోలీసు కార్యాలయ ప్రాంగణంలో జిల్లా ఎస్పీ శ్రీ తుహిన్ సిన్హా, ఆధ్వర్యంలో సంస్మరణ కార్యక్రమాన్ని ఘనంగా నిర్వహించారు. ఈ కార్యక్రమానికి జిల్లా కలెక్టర్ విజయ్ కృష్ణన్, ముఖ్య అతిథిగా హాజరయ్యారు. అమరుల స్మారక స్తూపం వద్ద స్మృతి పరేడ్ నిర్వహించి, పుష్పగుచ్ఛాలు ఉంచి ఘనంగా నివాళులర్పించారు. జిల్లా కలెక్టర్ మాట్లాడుతూ సమాజంలో శాంతిభద్రతల రక్షణ కోసం ముఖ పరిచయం లేని సాధారణ పౌరుల కోసం ప్రాణాలను సైతం త్యాగం చేసే గొప్ప వృత్తి యూనిఫాం సర్వీస్. గడచిన రెండేళ్లలో అనకాపల్లి జిల్లా ఎన్నో సవాళ్లను ఎదుర్కొంటూ వేగంగా అభివృద్ధి చెందుతోంది. జిల్లాకు రూ.4 లక్షల కోట్ల మేర భారీ పెట్టుబడులు వస్తున్నాయంటే దానికి ప్రధాన కారణం మన పోలీసు విభాగం కల్పిస్తున్న పటిష్టమైన శాంతిభద్రతలు, రక్షణే. పెట్టుబడిదారులకు, ప్రజలకు భయం లేకుండా ముందుకు సాగేలా నిరంతరం శ్రమిస్తున్న పోలీసుల కృషి ఎంతో గొప్పది. జిల్లా యంత్రాంగం, పోలీసు విభాగం, విద్యావ్యవస్థ పరస్పర సమన్వయంతో పనిచేసినప్పుడే సమాజం మరింత ప్రగతిపథంలో పయనిస్తుంది. విధి నిర్వహణలో ప్రాణాలర్పించిన అమరుల కుటుంబాలకు సమాజం ఎల్లప్పుడూ అండగా ఉంటుంది" అని పేర్కొన్నారు. జిల్లా ఎస్పీ శ్రీ తుహిన్ సిన్హా మాట్లాడుతూ "1959 అక్టోబర్ 21న చైనా సరిహద్దుల్లోని హాట్ స్ప్రింగ్స్ వద్ద దేశ రక్షణ కోసం పోరాడి అసువులు బాసిన 10 మంది సీఆర్పీఎఫ్ జవాన్ల స్మారకార్థం ప్రతి ఏటా ఈ దినాన్ని జరుపుకుంటున్నాం. ఈ ఏడాది దేశవ్యాప్తంగా 154 మంది, అందులో ఆంధ్రప్రదేశ్ రాష్ట్రం నుంచి ఒకరు విధి నిర్వహణలో వీరమరణం పొందారు. నేడు లెఫ్ట్ వింగ్ ఎక్స్‌ట్రీమిజం (నక్సలిజం), ఉగ్రవాదం వంటి సమస్యలు తగ్గుముఖం పట్టినప్పటికీ, సైబర్ నేరాలు, మహిళలపై జరిగే నేరాలు వంటి కొత్త సవాళ్లు ఎదురవుతున్నాయి. వాటిని అణచివేసేందుకు పోలీసు సిబ్బంది మరింత ప్రొఫెషనలిజంతో పనిచేయాలి. చట్టపరిధిలో తమ విధులను నిర్భయంగా, నిస్వార్థంగా నిర్వహించినప్పుడే అమరుల త్యాగాలకు నిజమైన నివాళి అర్పించినట్లవుతుంది. పోలీసు సిబ్బంది సమర్థవంతంగా పనిచేయడంలో వారి కుటుంబ సభ్యుల పాత్ర, మద్దతు ఎంతో కీలకమైనవి. అమరుల కుటుంబాల సంక్షేమానికి జిల్లా పోలీసు శాఖ ఎల్లప్పుడూ ప్రథమ ప్రాధాన్యం ఇస్తుంది" అని తెలిపారు. ​ఈ సందర్భంగా 1983 నుంచి ఉమ్మడి విశాఖపట్నం రూరల్ పరిధిలో వీరమరణం పొందిన 27 మంది అమరవీరుల వివరాలను, దేశవ్యాప్తంగా అమరులైన పోలీసుల పేర్లను అదనపు ఎస్పీ శ్రీ ఎల్.మోహన రావు చదివి వినిపించారు. అనంతరం కలెక్టర్ మరియు ఎస్పీల చేతుల మీదుగా 14 మంది అమరవీరుల కుటుంబ సభ్యులకు రూ.10,000/- చొప్పున నగదు చెక్కులను, జ్ఞాపికలను అందజేసి వారి యోగక్షేమాలను అడిగి తెలుసుకున్నారు. ​ఈ కార్యక్రమంలో అదనపు ఎస్పీ ఎల్.మోహన రావు, డీఎస్పీలు పి.శ్రీనివాస రావు, శ్రీ పి.వి.వి. నరసింహారావు, వి.బాబ్జీరావు, పరిపాలనాధికారి సిహెచ్.తిలక్ బాబు, ఇన్స్పెక్టర్లు బాల సూర్యారావు, ప్రేమ కుమార్, అశోక్ కుమార్, నాగేశ్వరరావు, రమేష్, రామకృష్ణారావు, మన్మధరావు, ఇతర పోలీసు అధికారులు, సిబ్బంది, అమరుల కుటుంబ సభ్యులు మరియు కృష్ణదేవిపేట జడ్పీ హైస్కూల్ ఎన్సీసీ క్యాడెట్లు పాల్గొన్నారు.

పాతపట్నం, సెప్టెంబర్‌ 28 సిక్కోలు గర్జన న్యూస్: వంశధార జలాశయం ఎగువ ప్రాంతంలోని సరుగుడు తోటలో విషాదకర ఘటన చోటుచేసుకుంది. పురుగుల మందు పిచికారీ చేసిన గడ్డి, సరుగుడు ఆకులను మేయడంతో సుమారు 20 గొర్రెలు, మేకలు మృతి చెందినట్లు బాధితులు తెలిపారు. ఒక్కసారిగా జీవాలు మృత్యువాత పడటంతో వాటిపై ఆధారపడి జీవిస్తున్న కాపరులు తీవ్ర ఆవేదనకు గురయ్యారు.బాధితులు, స్థానికులు తెలిపిన వివరాల ప్రకారం.. పాతపట్నం మండలం కొరసవాడ గ్రామానికి చెందిన గొర్రెల కాపరులు ఆదివారం తమ జీవాలను మేత కోసం సమీప ప్రాంతాలకు తోలుకెళ్లారు. ఈ క్రమంలో వంశధార జలాశయం ఎగువన ఉన్న సరుగుడు తోటలోకి గొర్రెలు, మేకలు ప్రవేశించాయి. అక్కడ పిచ్చి మొక్కలు, గడ్డి నివారణ కోసం కొద్దిరోజుల క్రితం పురుగుల మందు పిచికారీ చేసినట్లు స్థానికులు చెబుతున్నారు.ఈ విషయం తెలియని జీవాలు మందు పిచికారీ చేసిన గడ్డి, ఆకులను మేయడంతో కొద్దిసేపటికే అస్వస్థతకు గురైనట్లు కాపరులు తెలిపారు. అనంతరం సుమారు 35 జీవాలు అక్కడికక్కడే మృతి చెందినట్లు పేర్కొన్నారు.ఎన్నో ఏళ్లుగా గొర్రెలు, మేకల పెంపకంపై ఆధారపడి జీవనం సాగిస్తున్న తమకు ఈ ఘటన తీవ్ర నష్టాన్ని మిగిల్చిందని బాధిత కాపరులు ఆవేదన వ్యక్తం చేశారు. కళ్లముందే జీవాలు విలవిలలాడుతూ మృతి చెందడం చూసి కన్నీరుమున్నీరయ్యారు. తమ కుటుంబాలకు జీవనాధారంగా ఉన్న జీవాలను కోల్పోవడంతో ఆర్థికంగా తీవ్రంగా నష్టపోయామని వాపోయారు.ఘటనపై సంబంధిత అధికారులు తక్షణమే స్పందించి సంఘటనా స్థలాన్ని పరిశీలించాలని స్థానికులు కోరుతున్నారు. మృతిచెందిన జీవాలకు అసలు కారణాలను పశువైద్య అధికారులు నిర్ధారించాలని, పురుగుల మందు పిచికారీ చేసిన ప్రాంతంలో జీవాలు మేయకుండా ముందస్తు చర్యలు చేపట్టాలని విజ్ఞప్తి చేశారు.జీవాలను కోల్పోయిన బాధిత కాపరులకు ప్రభుత్వం తక్షణ ఆర్థిక సహాయం, నష్టపరిహారం అందించి ఆదుకోవాలని వారు కోరుతున్నారు. అధికారుల విచారణ అనంతరం ఘటనకు సంబంధించిన పూర్తి వివరాలు వెలుగులోకి రావాల్సి ఉంది.

adilabad : గాదిగూడ మండలం పరస్వాడ-బి గ్రామ శివారులోని వ్యవసాయ పొలంలో పత్తి పంటలో అంతర పంటగా అక్రమంగా గంజాయి సాగు చేస్తున్న వ్యక్తిని పోలీసులు అరెస్ట్ చేశారు. విశ్వసనీయ సమాచారం మేరకు పోలీసులు, వ్యవసాయ శాఖ అధికారుల సమక్షంలో తనిఖీలు నిర్వహించగా 60 గంజాయి మొక్కలను గుర్తించి స్వాధీనం చేసుకున్నారు. సుమారు 1 నుంచి 3 అడుగుల ఎత్తు పెరిగిన 60 గంజాయి మొక్కల విలువ సుమారు రూ.6 లక్షలు ఉంటుందని పోలీసులు తెలిపారు. సులభంగా ఎక్కువ డబ్బు సంపాదించాలనే ఉద్దేశంతో తన తండ్రి వ్యవసాయ భూమిలో పత్తి పంటతో పాటు గంజాయి మొక్కలను సాగు చేసినట్లు నిందితుడు విచారణలో వెల్లడించినట్లు తెలిపారు. *అరెస్టైన నిందితుడు:* కోడప మారుతి S/o పగ్గు, వయస్సు 34 సంవత్సరాలు, వృత్తి: రైతు, నివాసం: పరస్వాడ-బి, గడిగూడ మండలం. గంజాయి సాగు, విక్రయం, రవాణాకు పాల్పడే వారిపై చట్ట ప్రకారం కఠిన చర్యలు తీసుకుంటామని ఉట్నూర్ ASP రిత్విక్ సాయి కొట్టే IPS తెలిపారు. గంజాయి సాగు లేదా అక్రమ రవాణాకు సంబంధించిన సమాచారం ఉంటే పోలీసులకు తెలియజేయాలని సూచించారు. ఈ దాడిలో నార్నూర్ సీఐ అంజమ్మ, ఎస్సై రమ్య, సిబ్బంది తదితరులు పాల్గొన్నారు.