గర్భిణులకు జన చైతన్య సమితి సేవలు అభినందనీయం

జన చైతన్య సమితి ఆధ్వర్యంలో పెదకూరపాడుకు చెందిన నెలకుదుటి వెంకట రామారావు (నాని) జన్మదినాన్ని పురస్కరించుకుని, ఆయన సహకారంతో సోమవారం అమరావతి సామాజిక ఆరోగ్య కేంద్రంలో వైద్య పరీక్షల కోసం వచ్చిన గర్భిణులకు పోషకాహారాన్ని పంపిణీ చేశారు.

ఈ సందర్భంగా డాక్టర్ సరస్వతి మాట్లాడుతూ.. ప్రతి నెల 9వ తేదీన క్రమం తప్పకుండా గర్భిణులకు, వారికి సహాయంగా వచ్చిన కుటుంబ సభ్యులకు పోషకాహారం అందించడం మంచి కార్యక్రమమని కొనియాడారు. గర్భిణులకు సమతుల్యమైన ఆహారం అందించడం ద్వారా తల్లి ఆరోగ్యంతో పాటు పుట్టబోయే శిశువు ఆరోగ్యాన్ని కూడా మెరుగుపరచవచ్చని తెలిపారు. ఇలాంటి సేవా కార్యక్రమాలు నిర్వహిస్తున్న జన చైతన్య సమితి ప్రతినిధులను ప్రతి ఒక్కరూ ఆదర్శంగా తీసుకోవాలని అన్నారు.

జన చైతన్య సమితి కార్యదర్శి తుళ్లూరి సాంబశివరావు మాట్లాడుతూ.. సేవాభావంతో గర్భిణులకు పోషకాహారం అందించేందుకు ముందుకొచ్చిన నెలకుదుటి వెంకట రామారావు (నాని)కి అభినందనలు తెలిపారు. దాతల సహకారమే స్వచ్ఛంద సేవా కార్యక్రమాలకు ప్రధాన బలమని పేర్కొన్నారు.

ఈ కార్యక్రమంలో జన చైతన్య సమితి వ్యవస్థాపక అధ్యక్షుడు దాసరి విజయ్ బెన్నిబాబు, కోఆర్డినేటర్ వెలితోటి అనిల్ కుమార్, ప్రతినిధులు షేక్ లియాకత్ అలీ, షేక్ సుభాని, స్టాఫ్ నర్స్ పూదోట లిల్లీ రోజ్ రాణి తదితరులు పాల్గొన్నారు.

ఈ సందర్భంగా గర్భిణులకు భోజనంతో పాటు డ్రైఫ్రూట్స్ లడ్డూలు, శనగల లడ్డూలు, కోడిగుడ్లు, సీతాఫలాలు, దానిమ్మ, బత్తాయి, అరటిపండ్లను పంపిణీ చేశారు.