అనకాపల్లిలో ఇంటి దొంగతనం కేసు ఛేదన.. నిందితుడి అరెస్ట్

జిల్లా ఎస్పీ తుహిన్ సిన్హా, ఐపీఎస్ ఆదేశాల మేరకు, అనకాపల్లి సబ్ డివిజన్ డీఎస్పీ పి.వి.వి. నరసింహారావు మార్గదర్శకత్వంలో, సీఐ జి. ప్రేమ్ కుమార్ పర్యవేక్షణలో పోలీసులు ఈ కేసు దర్యాప్తు చేపట్టారు.

బీరువా తాళం పగులగొట్టి చోరీ

అనకాపల్లి పట్టణంలోని గాంధీనగరం ప్రాంతానికి చెందిన మెల్లిపాక ప్రమీల ఇంట్లో గత ఆగస్టు నెలలో గుర్తుతెలియని వ్యక్తి బీరువా తాళం పగులగొట్టి బంగారు ఆభరణాలను దొంగిలించాడు. బాధితురాలి ఫిర్యాదు మేరకు అనకాపల్లి టౌన్ పోలీస్ స్టేషన్‌లో క్రైమ్ నంబర్ 161/2026, సెక్షన్ 305(a) BNS కింద కేసు నమోదు చేసి దర్యాప్తు ప్రారంభించారు.

రైల్వే గేట్ సమీపంలో నిందితుడి అరెస్ట్

దర్యాప్తులో భాగంగా పోలీసులకు అందిన విశ్వసనీయ సమాచారం ఆధారంగా అనకాపల్లి టౌన్ ఎస్‌ఐ ఎ. వెంకటేశ్వరరావు తన సిబ్బందితో కలిసి నవంబర్ 12న మధ్యాహ్నం 12.30 గంటలకు అనకాపల్లి పట్టణంలోని సిటీ పబ్లిక్ స్కూల్ ఎదురుగా, లక్ష్మీదేవిపేట రైల్వే గేట్ రోడ్డు వద్ద నిందితుడిని అదుపులోకి తీసుకున్నారు.

అరెస్టయిన వ్యక్తిని పోణకర్లపల్లి నాగేంద్రకుమార్ (25)గా పోలీసులు గుర్తించారు. ఇతను గుల్లిపల్లి గ్రామం, కె.కోటపాడు మండలానికి చెందిన వ్యక్తి కాగా, ప్రస్తుతం అనకాపల్లిలోని అంజయ్య కాలనీ, గాంధీనగరంలో నివాసం ఉంటున్నట్లు తెలిపారు.

45.190 గ్రాముల బంగారు ఆభరణాలు స్వాధీనం

నిందితుడి వద్ద నుంచి పోలీసులు మొత్తం 45.190 గ్రాముల బంగారు ఆభరణాలను స్వాధీనం చేసుకున్నారు. వాటి వివరాలు ఇలా ఉన్నాయి.

1. బంగారు నల్లపూసల తాడు – 24.840 గ్రాములు
2. బంగారు నెక్లెస్ – 8.500 గ్రాములు
3. బంగారు చైనుతో కూడిన లాకెట్ – 6.420 గ్రాములు
4. బంగారు బ్రాస్లెట్ – 3.140 గ్రాములు
5. బంగారు ఉంగరం – 2.290 గ్రాములు

కేసు ఛేదించిన పోలీసు సిబ్బందికి అభినందనలు

నిందితుడిని అరెస్ట్ చేసి, చోరీకి గురైన ఆభరణాలను స్వాధీనం చేసుకున్న అనంతరం పోలీసులు చట్టపరమైన ప్రక్రియ పూర్తి చేసి నిందితుడిని న్యాయస్థానం ఎదుట హాజరుపరిచారు.

ఈ కేసు ఛేదనలో ఎస్‌ఐ ఎ. వెంకటేశ్వరరావుతో పాటు కానిస్టేబుళ్లు పీసీ-2178 ఎం. సముద్రం, పీసీ-2291 ఆర్.పి. నాయుడు, పీసీ-2342 టి.ఎస్. నాయుడు పాల్గొన్నారు. కేసును ఛేదించి చోరీ సొత్తును రికవరీ చేసిన పోలీసు అధికారులను, సిబ్బందిని ఉన్నతాధికారులు అభినందించారు.

– ప్రజా ముద్ర NEWS | అనకాపల్లి జిల్లా