తాళ్లపాలెంలో ఎన్నికల నియమావళిపై పోలీసుల అవగాహన

జిల్లా ఎస్పీ తుహిన్ సిన్హా (ఐపీఎస్), అనకాపల్లి సబ్ డివిజన్ డీఎస్పీ పి.వి.వి. నరసింహారావు ఆదేశాల మేరకు కసింకోట సీఐ స్వామి నాయుడు, ఎస్సై లక్ష్మణ్ రావు గ్రామాన్ని సందర్శించి స్థానికులతో సమావేశమయ్యారు.

ఈ సందర్భంగా ఎన్నికల ప్రవర్తనా నియమావళి, ఎన్నికల సమయంలో పాటించాల్సిన నిబంధనలు, శాంతిభద్రతల పరిరక్షణ వంటి అంశాలను గ్రామస్తులకు వివరించారు. ముఖ్యంగా యువత ఎన్నికల సమయంలో బాధ్యతాయుతంగా వ్యవహరించాలని, ఎలాంటి అవాంఛనీయ సంఘటనలకు తావివ్వకూడదని సూచించారు.

ఎన్నికల ప్రక్రియ సజావుగా సాగేందుకు ప్రజలందరూ పోలీసులకు సహకరించాలని సీఐ స్వామి నాయుడు కోరారు. ఎన్నికల పేరుతో గొడవలకు దిగడం, శాంతిభద్రతలకు భంగం కలిగించడం, నిబంధనలకు విరుద్ధంగా వ్యవహరించడం వంటి చర్యలకు పాల్పడితే చట్టప్రకారం కఠిన చర్యలు తీసుకుంటామని పోలీసులు హెచ్చరించారు.

గ్రామంలో ప్రశాంత వాతావరణాన్ని కాపాడుకోవడం ప్రతి ఒక్కరి బాధ్యత అని పోలీసులు ఈ సందర్భంగా స్పష్టం చేశారు. ఈ కార్యక్రమంలో పోలీసు సిబ్బంది, గ్రామ పెద్దలు, యువత పాల్గొన్నారు.